Reuters: ტრამპის მკვეთრი კრიტიკა ევროპელი მოკავშირეების მისამართით აშშ-სა და ევროპას შორის არსებულ განხეთქილებას უფრო აღრმავებს

სააგენტო Reuters-ის ინფორმაციით, უკანასკნელ კვირებში განვითარებული მოვლენები ოპტიმიზმის მიზეზი ვერ იქნებოდა მათთვის, ვინც ფიქრობდა, რომ ევროპა აშშ-ის პრეზიდენტთან, დონალდ ტრამპთან არსებული რთული ურთიერთობების დაძლევას შეძლებდა.

ცნობილია, რომ მიმდინარე კვირას ამერიკის პრეზიდენტი ირანთან ომის კრიტიკის გამო გერმანიის კანცლერს, ფრიდრიხ მერცს დაუპირისპირდა. ტრამპმა მერცს „აბსოლუტურად არაეფექტური“ უწოდა. მოგვიანებით პენტაგონში განაცხადეს, რომ 36 400-იან ამერიკულ სამხედრო კონტინგენტს 5 ათასი ჯარისკაცით შეამცირებენ, აგრეთვე გაზრდიან გადასახადებს ევროკავშირიდან იმპორტირებულ მსუბუქ და სატვირთო ავტომობილებზე. აღნიშნული ნაბიჯი ძლიერ დაარტყამს გერმანიას, წერს გამოცემა.

გარდა ამისა, ტრამპმა დიდი ბრიტანეთის პრემიერ-მინისტრი, კირ სტარმერიც გააკრიტიკა და ხაზი გაუსვა, რომ „ის არ არის უინსტონ ჩერჩილი“. ტრამპი სტარმერს დაემუქრა, რომ დიდი ბრიტანეთიდან იმპორტირებულ პროდუქციას „დიდ ტარიფებს“ დაუწესებს.

„ტრამპის თავდაცვის დეპარტამენტი ნატოს მოკავშირეების, რომლებიც აშშ-ის სამხედრო ოპერაციას ირანში მხარს არ უჭერენ, დასჯის იდეით გამოვიდა. კერძოდ, საუბარია ნატოში ესპანეთის წევრობის შეჩერებაზე და აშშ-ის მიერ ფოლკლენდის კუნძულებზე დიდი ბრიტანეთის სუვერენიტეტის აღიარების გადაწყვეტილების გადახედვაზე“, - წერს გამოცემა.

ამის ფონზე, ერთ-ერთმა ევროპელმა დეპუტატმა გამოცემას განუცხადა: „რბილად რომ ვთქვათ, ეს ნერვების მომშლელია. ჩვენ ნებისმიერ დროს ყველაფრისთვის მზად ვართ“.