მაგთიკომი ფარული მოსმენების კანონპროექტს აკრიტიკებს

"მაგთიკომი" ფარული მოსმენების კანონპროექტს აკრიტიკებს და პრეზიდენტს წერილით მიმართავს. განცხადებაში ნათქვამია, რომ ავტორიზებული პირებისთვის დაკისრებული ვალდებულებების სრულყოფილად აღსრულება შეუძლებელია. კომპანია სამუშაო ჯგუფის შექმნას ითხოვს, რომელიც ყველა დაინტერესებული მხარის წარმომადგენლისგან დაკომპლექტდება. "მაგთიკომისთვის" ბაზარზე კიდევ ერთი მარეგულირებლის გაჩენა მიუღებელია.

"ახალი სუბიექტი - სსიპ ოპერატიულ-ტექნიკური სააგენტო კანონპროექტით გვევლინება, როგორც ელექტრონული კომუნიკაციის სფეროში მეორე მარეგულირებელი ორგანო კომუნიკაციების ეროვნულ კომისიასთან ერთად. ახალი სუბიექტის უფლებამოსილებები საკმაოდ ზოგადი და ბუნდოვანია, რაც მომავალში საკმაოდ ბევრ გაუთვალისწინებელ რისკს წარმოშობს. სუბიექტის დაფუძნება და საქმიანობა, რომელიც ახდენს ელექტრონული კომუნიკაციების სფეროში დამატებით რეგულირებას მარეგულირებელი ორგანოსგან დამოუკიდებლად და მასთან შეუთანხმებლად, შეუსაბამობაში მოვა კომუნიკაციების კომისიის საქმიანობის სპეციფიკასა და მისი რეგულირების წესებთან, რაც გამოიწვევს ავტორიზებული პირებისთვის არაპროგნოზირებად გარემოს ბიზნესის მართვის თვალსაზრისით. სააგენტოსთვის დისკრეციული უფლებამოსილებების მინიჭება გამოიწვევს დაუსაბუთებელ დისკრიმინაციულ მიდგომებს ავტორიზებული პირებისადმი. ავტორიზებული პირები იძულებულები იქნებიან, შეისყიდონ მოთხოვნილი სტანდარტის პროდუქცია, ტექნიკური და პროგრამული უზრუნველყოფის მწარმოებლების და მიმწოდებლებისგან, ბაზარზე არსებული მაღალი ფასით", - წერია "მაგთიკომის" განცხადებაში.