იუსტიციის უმაღლეს საბჭოში ანა დოლიძე რუსულ ორგანიზაციასთან კავშირში დაადანაშაულეს

იუსტიციის უმაღლესი საბჭო ხმაურიანი განცხადებებით დაიწყო. საბჭოს მოსამართლე წევრებმა ანა დოლიძე რუსულ ორგანიზაციასთან კავშირში დაადანაშაულეს და აღნიშნეს, რომ ის შესაძლოა ორგანიზაციას საქართველოს შესახებ ინფორმაციას აწვდიდა.

"ანა დოლიძე საამაყოდ მიიჩნევს, იმ ფაქტს, რომ აგროვებდა 2008 წლის აგვისტოს ომში ქართველი ჯარისკაცების მაკომპრომეტირებელ მასალებს, იმისათვის რომ საქართველოს წინააღმდეგ შეტანილი ყოფილიყო საჩივრები ევროპულ სასამართლოში და პირიქით იაფასიანად მიიჩნევს პატრიოტულ გრძნობებს ადამიანში. ჩვენ გვიჩნდება კითხვა და ალბათ საზოგადოებასაც უჩნდება კითხვა, ამგვარი მორალის ადამიანი რატომ უნდა იყოს იუსტიციის უმაღლესი საბჭოს წევრი და მონაწილეობას იღებდეს ისეთი მნიშვნელოვანი გადაწყვეტილებების მიღებაში, როგორიც არის მოსამართლეების დანიშვნა", - განაცხადა დიმიტრი გვრიტიშვილმა.

სერგო მეთოფიშვილის თქმით კი, ანა დოლიძის მუშაობის პერიოდში მის ორგანიზაციას შეტანილი აქვს სარჩელები საქართველოს წინააღმდეგ.

"მე არ ვამბობ, რომ ანა დოლიძე არის მატაჰარივით, შპიონი, ალბათ თანამშრომლობდა ანაზღაურების გამო. ეს ორგანიზაცია ოკუპანტის სასარგებლოდ ატარებდა კვლევებს,"- აღნიშნა მეთოფიშვილმა.

თუმცა დოლიძე ამბობს, რომ ორგანიზაცია სახელწოდებით რუსული მართლმსაჯულების ინიციატივა, რომელთანაც ის თანამშრომლობდა, ჰოლანდიაში დაფუძნებული ორგანიზაციაა, რომელიც რუსეთის წინააღმდეგ იძიებს საქმეებს და სწორედ მათ სახელზეა არაერთი სარჩელი, რომელიც ევროსასამართლოში რუსეთის წინააღმდეგ შევიდა.

"სამწუხაროა, რომ საბჭო აგრძელებს იმავე ხაზს, ეს არის ჩვეულებრივი შავი პიარკამპანია, იმისათვის რომ ყურადღება გადავიდეს იმ პრობლემებიდან, რომელიც აქვს მართლმსაჯულებას. ეს არგუმენტი არის პირდაპირი გაგრძელება ჩიორა თაქთაქიშვილის მიერ გაჟღერებული სიცრუისა. ორგანიზაცია რომელთანაც ვთანამშრომლობდი არის ჰოლანდიაში დაფუძნებული ორგანიზაცია, რომლის ამოცანა არის და იყო რუსეთის გასამართლება ადამიანის უფლებათა დარღვევისთვის,"- აღნიშნა დოლიძემ.

იუსტიციის საბჭოში უვადოდ გამწესების მსურველ მოსამართლეებთან გასაუბრებაზე ანა დოლიძის აცილება რამდენიმე მოსამართლემ მოითხოვა.

მოსამართლეებმა აცილების გადაწყვეტილების მიზეზი განმარტეს. მათი შეფასებით, იუსტიციის უმაღლესი საბჭოს არამოსამართლე წევრმა ანა დოლიძემ სასამართლო სისტემისადმი და მოსამართლეებისადმი შეურაცხმყოფელი განცხადებები გააკეთა, რაც მათთვის მიუღებელია.

8 იანვარს პრეზიდენტმა გიორგი მარგველაშვილმა იუსტიციის უმაღლესი საბჭოს წევრის ვაკანტურ თანამდებობაზე ანა დოლიძე დანიშნა.