ადვოკატების ნაწილმა მოსამართლე ლევან მურუსიძის აცილების მოთხოვნით კამპანია დაიწყო

სააპელაციო სასამართლოს მოსამართლის, ლევან მურუსიძის სასამართლო სხდომებიდან აცილების მოთხოვნით ადვოკატების ნაწილმა კამპანია დაიწყო. ამის შესახებ იუსტიციის უმაღლესი საბჭოს არამოსამართლე წევრმა ანა დოლიძემ თქვა. ინფორმაციას სააგენტო "ინტერპრესნიუსი" ავრცელებს.

კამპანიაში ამ დროისთვის 10-მდე ადვოკატია ჩართული და მას "აიცილე ლევან მურუსიძე" ჰქვია. ანა დოლიძის თქმით, ადვოკატები მურუსიძის აცილებას მის წარსულთან დაკავშირებული კითხვების, რეპუტაციისა და მიკერძოებულობის გამო ითხოვენ. 

ანა დოლიძის თქმით, ასეთი კამპანია მოსალოდნელი იყო:

„ადვოკატები პასუხისმგებლობას იღებენ მოქალაქეების წინაშე და მათ ინტერესებს წარმოადგენენ. ბუნებრივია, რომ როდესაც სასამართლო პროცესზე ხვდება მოსამართლე ისეთი რეპუტაციული ტვირთით, რა ტვირთიც აქვს ლევან მურუსიძეს, ადვოკატს გარკვეული კითხვები გაუჩნდება - კარგად წავა თუ არა პროცესი, არის თუ არა შესაძლებელი პროცესი ანდოს ამ მოსამართლეს, რამდენად მიუკერძოებელი იქნება ეს მოსამართლე. ამიტომ, ეს კამპანია იყო მოსალოდნელი. ასევე მოსალოდნელი იყო, რომ პირველ რიგში, სწორედ ამ პროფესიის წარმომადგენლებს, ადვოკატებს გაუჩნდებოდათ დისკომფორტი, როდესაც სასამართლო დარბაზში დახვდებათ ლევან მურუსიძე - ადამიანი, რომლის მოსამართლეობრივი რეპუტაცია ძალიან დაზიანებულია“, - თქვა ანა დოლიძემ.

არასამთავრობო სექტორი სასამართლო სისტემიდან სულ ცოტა 10 მოსამართლის გაშვებას ითხოვს. ესენი არიან მიხეილ ჩინჩალაძე, ლევან მურუსიძე და იუსტიციის უმაღლესი საბჭოს ის მოსამართლე წევრები, რომლებმაც 2018 წლის დეკემბერში უზენაეს სასამართლოში უვადოდ გასამწესებელ ათკაციან სიას მხარი დაუჭირეს. ეს მოსამართლეები არიან: გიორგი მიქაუტაძე, ვასილ მშვენიერაძე, სერგო მეთოფიშვილი, ირაკლი შენგელია, რევაზ ნადარაია, ირაკლი ბონდარენკო, დიმიტრი გვრიტიშვილი და თამარ ონიანი.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 24 დეკემბერს იუსტიციის უმაღლესმა საბჭომ უზენაეს სასამართლოში წარსადგენ მოსამართლეთა 10 კანდიდატურა დაასახელა. ამ კანდიდატების დასახელებამ საზოგადოების ვნებათაღელვა გამოიწვია.

მოგვიანებით მოსამართლეებმა კანდიდატურები მოხსნეს და შეიქმნა სამუშაო ჯგუფი უზენაესი სასამართლოს მოსამართლეების კანდიდატების შერჩევის კრიტერიუმების დასადგენად.