მოსმენების კანონპროექტს ჯეოსელიც აკრიტიკებს

კომპანია "ჯეოსელი" ფარულ მოსმენა-მიყურადღებასთან დაკავშირებით პარლამენტში ინიცირებული კანონპროექტის შესახებ განცხადებას ავრცელებს.

კომპანიაში ამბობენ, რომ ფარულ საგამოძიებო მოქმედებებთან დაკავშირებით კანონპროექტის განხილვა ავტორიზებული პირების სათანადო ჩართულობის და მათი პოზიციების გაზიარების გარეშე მიმდინარეობს,  რაც მათთვის მიუღებელია. 

"საკანონმდებლო პაკეტი არსებით გავლენას ახდენს როგორც ელექტრონული კომუნიკაციების სფეროში ავტორიზებული პირის საქმიანობაზე, ვალდებულებებზე, ასევე ბიზნესის განვითარების სამომავლო გეგმებზეც... ადამიანის ძირითადი უფლებების შეზღუდვა საჯარო ინტერესების დაცვის მოტივით უნდა ხორციელდებოდეს მხოლოდ სამართლიანი და პროპორციული კონტროლის მექანიზმების არსებობის პირობებში. წარმოდგენილ კანონპროექტში განსაკუთრებით აღსანიშნავია, ავტორიზებული პირების ის მძიმე ვალდებულებები, რომლებიც მათ აკისრებს შეუზღუდავი და ბუნდოვანი ხარჯების გაწევას. ამასთან, არ არსებობს არანაირი გარანტია რომ ხარჯების გაწევის პროცესი იქნება გამჭვირვალე," - წერია ჯეოსელის მიერ გავრცელებულ განცხადებაში.

მოსმენების კანონპროექტი გააკრიტიკეს კომპანიებმა "ბილაინმა" და "მაგთიმ".