ბილაინს მოსმენების კანონპროექტი არ მოსწონს

ფარულ მოსმენა-მიყურადღებასთან დაკავშირებით პარლამენტში ინიცირებული კანონპროექტი დასახვეწია, - ფიქრობენ "ბილაინში". კომპანიის ინფორმაციით, არცერთი ავტორიზებული პირი, რომელსაც უშუალოდ შეეხება ასამოქმედებლი კანონპროექტი, არ ყოფილა ჩართული საკანონმდებლო პაკეტის შემუშავებაში. "ბილაინს" მიაჩნია, რომ უნდა შეიქმნას სამუშაო ჯგუფი, რომელიც დაკომპლექტდება ყველა დაინტერესებული მხარის წარმომადგენლით და მოხდება საკანონმდებლო ცვლილებებთან დაკავშირებულ ყველა საკითხზე საბოლოო პოზიციების შეჯერება-შეთანხმება. 

"საკანონმდებლო პაკეტი ითვალისიწინებს ახალი ორგანოს - სსიპ "საქართველოს ოპერატიულ-ტექნიკური სააგენტოს" შექმნას, რომელიც გვევლინება ავტორიზებული პირების დამატებით მარეგულირებელ ორგანოდ. კანონპროექტით, სააგენტოს ენიჭება უფლებამოსილება, განახორციელოს ავტორიზებული პირების საქმიანობის აუდიტი, დააკისროს მათ სანქცია, მოახდინოს დაკისრებული ჯარიმის იძულებითი აღსრულება და, აგრეთვე, გააუქმოს ავტორიზაცია, რაც გულისხმობს ამ სფეროში საქმიანობის უფლების ჩამორთმევას. გამომდინარე იქიდან, რომ საქართველოს კომუნიკაციების ეროვნული კომისია წარმოადგენს სახელმწიფოს მიერ განსაზღვრული სფეროს რეგულირების მიზნით შექმნილ, სპეციალური უფლებაუნარიანობის მქონე საჯარო სამართლის იურიდიულ პირს, რომელსაც არ ჰყავს სახელმწიფო მაკონტროლებელი ორგანო, კანონპროექტის აღნიშნული დანაწესი ეწინააღმდეგება "ეროვნული მარეგულირებელი ორგანოების შესახებ" საქართველოს კანონის მე-6 მუხლის პირველი პუნქტს, რომლის თანახმადაც, ეროვნული მარეგულირებელი ორგანო და კომისიის წევრი თავიანთი საქმიანობის ფარგლებში დამოუკიდებელი არიან და ემორჩილებიან მხოლოდ საქართველოს კანონმდებლობას", - აღნიშნულია განცხადებაში. 

"ბილაინის" ინფორმაციით, კანონპროექტი ასევე ეწინააღმდეგება ევროკავშირთან ასოცირების ხელშეკრულებით საქართველოს მიერ ნაკისრ ვალდებულებებს, ევროპის პარლამენტისა და ევროპის საბჭოს დირექტივებს, რომლებიც ითვალიწინებს მარეგულირებელი ორგანოების დამოუკიდებლობას როგორც სახელმწიფო ორგანოების, ისე მათ მიერ რეგულირებად ბაზარზე მოქმედი სუბიექტებისგან.

კომპანიაში აცხადებენ, რომ ახალი სააგენტოს მიერ ახალი რეგულაციებისა და ვალდებულებების შემოღება ავტორიზებული პირებისთვის დამატებით ხარჯებს გამოიწვევს.

ბაზარზე კიდევ ერთი მარეგულირებლის გაჩენა მიუღებელია "მაგთიკომისთვისაც", რომელმაც სპეციალური განცხადება აღნიშნულ საკითხთან დაკავშირებით დღეს გაავრცელა.