პრემიერმინისტრმა საქართველოს დამოუკიდებლობის დღე მიულოცა

საქართველოს პრემიერმინისტრმა გიორგი კვირიკაშვილმა, თავისუფლების მოედანზე, ქართველი სამხედროების ფიცის დადების ცერემონიის შემდეგ სიტყვით გამოსვლილას საზოგადოებას საქართველოს დამოუკიდებლობის დღე მიულოცა.

სიტყვით გამოსვლისას პრემიერმინისტრმა აღნიშნა, რომ წელს, როდესაც ჩვენ სამშობლოს ჭრილობები ჯერაც არ მოუშუშებია, ყველაზე მეტად გვჭირდება ერთობა და შეკავშირება.

გიორგი კვირიკაშვილმა პარტნიორი ქვეყნების ლიდერებს მადლობა გადაუხადა მხარდაჭერისთვის.

"მინდა მადლობა გადავუხადო ყველას მხარდაჭერისთვის, სახელმწიფოს აღმშენებლობის საქმეში დახმარებისთვის, განსაკუთრებით ჩვენს მთავარ სტრატეგიულ პარტნიორ აშშ-ს, რომელთან თანამშრომლობაც უპრეცედენტო მასშტაბებს იღებს. სხვაგვარად, ვერ შევძლებთ იმ დიდი მიზნის მიღწევას რასაც ქვეყნის გამთლიანება ჰქვია. ჩვენ ყველა ერთად, მხოლოდ მშვიდობისა და შერიგების გზით, ჩვენი აფხაზი და ოსი ძმების ნდობის აღდგენით მივაღწევთ სანუკვარ მიზანს და მათთან ერთად ვიცხოვრებთ ერთიან საქართველოში“, - განაცხადა გიორგი კვირიკაშვილმა.

პრემიერმა ასევე მადლობა გადაუხადა საქართველოს პირველი რესპუბლიკის დამფუძნებლების შთამომავლებს საქართველოში ჩამოსვლისთვის.

"ამ დიდი ისტორიული თარიღის აღსანიშნავად ჩვენთან ერთად არიან საქართველოს პირველი რესპუბლიკის დამფუძნებლების შთამომავლები. კეთილი იყოს თქვენი ჩამობრძანება სამშობლოში! ვულოცავ ამ ღირსშესანიშნავ დღესასწაულს მთელ საქართველოს, თითოეულ მოქალაქეს, უცხოეთში მცხოვრებ ყველა ჩვენს თანამემამულეს! განსაკუთრებით ვულოცავ დღევანდელ დღეს ჩვენს წვევამდელებს.

საპატიო და ამაღელვებელია ეს დღე მათთვის, ვინც საქართველოს სხვადასხვა კუთხეში სამშობლოს ერთგულების ფიცი დადო და საქართველოს ჯარისკაცი გახდა. მე მჯერა, რომ თქვენ პირნათლად მოიხდით ვალს სამშობლოს წინაშე, თითოეული თქვენგანი ჩვენი ქვეყნის ერთგული ჯარისკაცი იქნება და ღირსეულად ატარებს ქართველი მეომრის საპატიო სახელს. მჯერა, თქვენ ბოლომდე გაუფრთხილდებით მათ სახელებს, ვინც სიცოცხლე შესწირა და სისხლი დაღვარა საქართველოსთვის. ჩვენ ყველანი ქედს ვიხრით ჩვენი გმირების წინაშე, სამშობლო არასოდეს დაივიწყებს მათ უკვდავ სახელებს. ქვეყნის ცხოვრებაში დგება დღეები და წუთები, რომლებიც მომავალს ქმნიან და ერის ბედს წყვეტენ. 100 წლის წინ სწორედ ასეთი დღე იყო საქართველოსთვის 26 მაისი", განაცხადა გიორგი კვირიკასვილმა.

დღეს საქართველო დამოუკიდებლობის 100 წლის იუბილეს აღნიშნავს.