საფრანგეთის პრეზიდენტი საქართველოს დამოუკიდებლობის დღეს ულოცავს

საფრანგეთის პრეზიდენტი ემანუელ მაკრონმა საქართველოს პრეზიდენტს მისალოცი წერილი გაუგზავნა.

მაკრონი საქართველოს პრეზიდენტსა და ქართველ ხალხს საქართველოს დამოუკიდებლობის დღის ეროვნულ დღესასწაულს. წერილის ტექსტს პრეზიდენტის ადმინისტრაცია ავრცელებს.

"გილოცავთ საქართველოს ეროვნულ დღესასწაულს თქვენ და მთელ ქართველ ხალხს და გულმხურვალედ გისურვებთ ბედნიერებას, მშვიდობასა და კეთილდღეობას. მინდა კიდევ ერთხელ დავადასტურო საფრანგეთის მეგობრული განწყობა თქვენი ქვეყნისადმი და ჩემი მისწრაფება, მომავალში კიდევ უფრო განმტკიცდეს ძმური ურთიერთობები ჩვენს ხალხებს შორის.

თქვენი ეროვნული დღესასწაული წელს განსაკუთრებულ მნიშვნელობას იძენს, რადგან ამ დღეს აღინიშნება საქართველოს პირველი დემოკრატიული რესპუბლიკის დაარსების ასი წლისთავი. მოხარული ვარ, რომ ჩვენი საგარეო საქმეთა მინისტრი ბატონი ჟან–ივ ლე დრიანი ამ დღეს თქვენს გვერდით აღნიშნავს თბილისში.

ეს მოვლენა ნაწილია 1918 წლის ასი წლისთავის კოლექტიური მოგონებისა, იმ კონფლიქტის გახსენებისა, რომელმაც დაანაწევრა ევროპის კონტინენტი, ასევე ახალი სახელმწიფოების წარმოქმნის აღნიშვნისა. საქართველო, როგორც რესპუბლიკა, სწორედ მაშინ გამოჩნდა საერთაშორისო არენაზე, თუმცა, ამავდროულად ეს იყო უძველესი კულტურის მქონე ერის დამოუკიდებლობის აღდგენა.

იმ არეულ ეპოქაში საქართველოს დამოუკიდებლობამ, სამწუხაროდ, დიდხანს ვერ გასტანა. მე დიდად ამაყი ვარ იმ მიღებით, რომელიც საფრანგეთმა გაუწია საქართველოს გადასახლებაში მყოფ მთავრობას 1921 წელს. ლევილ სურ ორჟის მამული, რომელიც თანამედროვე საქართველოს სახელმწიფოს მფლობელობაში გადავიდა 2016 წელს, მოწმეა იმ ეპოქისა, როდესაც ჩვენმა რესპუბლიკებმა ასეთი სოლიდარობა გამოიჩინეს ერთმანეთის მიმართ.

ჩვენს ქვეყნებს შორის არსებული მყარი მეგობრული კავშირის ნათელი დადასტურებაა ქართული და ფრანგული სამხედრო კონტინგენტების მეგობრობა, რომლებიც გვერდიგვერდ იბრძვიან სამშვიდობო ოპერაციებში, როგორც ეს ახლახან ცენტრალური აფრიკის რესპუბლიკაში იყო.

დარწმუნებული ბრძანდებოდეთ, რომ საფრანგეთი მომავალშიც გააგრძელებს საქართველოს დამოუკიდებლობისა და სუვერენიტეტის, ევროგაერთიანებასა და ნატოს-თან თქვენი პარტნიორობის მხარდაჭერას, თქვენი ქვეყნისა და მთლიანად რეგიონის უსაფრთხოების, სტაბილურობისა და განვითარების ხელშეწყობას", - წერია ემანუელ მაკრონის მისალოც წერილში.

საქართველო დღეს დამოუკიდებლობის 100 წლის იუბილეს აღნიშნავს.

მისალოცი ვიდეომიმართვა გაავრცელა ევროკავშირის ელჩმა. საქართველოს დამოუკიდებლობის დღეს ქართულად ულოცავს საქართველოში აშშ-ის ელჩი, ასევე აშშ-ის სახელმწიფო დეპარტამენტი. ბრიტანეთის ელჩი და მისი უდიდებულესობა დედოფალი ელისაბედ მეორე. საქართველოს დამოუკიდებლობის იუბილეს აზერბაიჯანიც ულოცავს, ასევე, სომხეთის ახლად არჩეული პრემიერმინისტრი, ნიკოლ ფაშინიანიც. გიორგი მარგველაშვილს დამოუკიდებლობის დღე მიულოცა ბელორუსიის პრეზიდენტმა, ალექსანდრე ლუკაშენკომ.

კორპორაცია Google საქართველოს დამოუკიდებლობის დღეს და საქართველოს დემოკრატიული რესპუბლიკის 100 წლის იუბილეს ე.წ. დუდლით ულოცავს.

26 მაისს, პირველი რესპუბლიკის 100 წლისთავისადმი მიძღვნილ საზეიმო ღონისძიებებში მონაწილეობა შვიდმა პრეზიდენტმა და 20-მდე ქვეყნის უმაღლესი რანგის დელეგაციამ მიიღო.