გია ვოლსკი: არსებობს მოსაზრება, რომ სალომე ზურაბიშვილს დავუჭიროთ მხარი

გია ვოლკსკი პირველი აღმოჩნდა უმრავლესობის რიგებში, რომელმაც საპრეზიდენტო არჩევნებზე იმ დამოუკიდებელი კანდიდატის ვინაობა დააკონკრეტა, რომელსა შესაძლოა ქართულმა ოცნებამ მხარი დაუჭიროს. მანამდე ამის შესახებ მხოლოდ ზოგადი განცხადებები კეთდებოდა.

„არის საკმაოდ მყარი მოსაზრება, რომ იქნებ სალომე ზურაბიშვილს დავუჭიროთ მხარი ან საერთოდ არ ჩავერთოთ ამ პროცესებში, განაცხადა ვოლსკიმ ჟურნალისტებთან საპრეზიდენტო კანდიდატზე დასმული კითხვის პასუხად. ინფორმაციას „ინტერპრესნიუსი ავრცელებს.

მისი თქმით, გუნდში კანდიდატთან დაკავშირებით საბოლოო გადაწყვეტილება მიღებული არ არის და ასევე არსებობს მოსაზრება, რომ კანდიდატი გუნდიდან „ამოიწიოს“.

„მიმდინარეობს კონსულტაციები. არის საკმაოდ მყარი მოსაზრება, რომ იქნებ სალომე ზურაბიშვილს დავუჭიროთ მხარი ან საერთოდ არ ჩავერთოთ ამ პროცესებში, მაგრამ ჯერჯერობით გადაწყვეტილად ვერაფერს გეტყვით. პერსონალიზაცია არ მომხდარა გუნდში. ზოგი ფიქრობს, რომ ჩვენ გვაქვს საკმარისი რესურსი, რათა კანდიდატი პარტიის რიგებიდან იყოს წამოწეული. არსებობს ასევე მყარი და საინტერესო მოსაზრება, რომ პარტიას გააჩნია მართვის მყარი ბერკეტები და ამას დაბალანსება სჭირდება“, - განაცხადა ვოლსკიმ.

გუშინ საზოგადოებრივი მაუწყებლის პირდაპირ ეთერში „ქართული ოცნების“ თავმჯდომარემ, ბიძინა ივანიშვილმა თქვა, რომ მისი პოზიცით, გუნდიდან კანდიდატი არ უნდა დასახელდეს და მათ დამოუკიდებელ კანდიდატს უნდა დაუჭირონ მხარი.

13 ივლისს გავრცელდა ინფორმაცია, რომ საქართველოს პარლამენტის უპარტიო წევრი სალომე ზურაბიშვილი 2018 წლის საპრეზიდენტო არჩევნებში დამოუკიდებელ კანდიდატად კენჭისყრას აპირებდა; ითქვა, რომ სწორედ ის იქნებოდა კანდიდატი, რომელსაც მმართველი პარტია „ქართული ოცნება“ მხარს დაუჭერდა, რადგან ხელისუფლება ამ არჩევნებში თავისი კანდიდატის წარდგენას არ გეგმავს. ზურაბიშვილმა „ოცნებასთან“ მოლაპარაკებების შესახებ ინფორმაცია უარყო

„ნაციონალურმა მოძრაობამ“ რამდენიმე ოპოზიციურ ჯგუფთან ერთად პრეზიდენტობის კანდიდატად გრიგოლ ვაშაძე წარადგინა, „ევროპულმა საქართველომ“ - დავით ბაქრაძე; „გირჩის“ კანდიდატია - ზურაბ ჯაფარიძე; თავისი გეგმების შესახებ ჯერჯერობით არაფერს  ამბობსმოქმედი პრეზიდენტი გიორგი მარგველაშვილი, რომელიც „ოცნების“ მხრიდან კანდიდატის წარდგენას ელოდება. ამასთან, მარგველაშვილის პასუხს ელოდება „შენების მოძრაობის“ ლიდერი დავით უსუფაშვილიც, რომელიც ასევე იყრის კენჭს პრეზიდენტად იმ შემთხვევაში თუ მარგველაშვილი თანამშრომლობაზე უარს ეტყვის. 

საქართველოში საპრეზიდენტო არჩევნები ოქტომბერში გაიმართება