საპრეზიდენტო კანდიდატთან დაკავშირებით მმართველ გუნდში აზრთა სხვადასხვაობაა

საპრეზიდენტო კანდიდატზე პოზიციის დაფიქსირება არ გვეჩქარება, გადავხედავთ არსებულ სპექტრს და იმის მიხედვით მივიღებთ გადაწყვეტილებას, - ამის შესახებ საქართველოს პარლამენტის თავმჯდომარემ, ირაკლი კობახიძემ ჟურნალისტებს განუცხადა.

როგორც კობახიძემ აღნიშნა, საპრეზიდენტო კანდიდატთან დაკავშირებით გუნდში იყო აზრთა სხვადასხვაობა, თუმცა გადაწყვეტილება, რომ „ქართული ოცნება“ არ წარადგენს თავის კანდიდატს, საბოლოოა.

ამ გადაწყვეტლებას არ ეთანხმება საპარლამენტო უმრავლესობის წევრი, დეპუტატი დიმიტრი ხუნდაძე. მან დღეს პრესკონფერენცია გამართა და განაცხადა, რომ შეთანხმებას არ იზიარებს და საკითხს უმრავლესობის უახლოეს სხდომაზე დააყენებს. ხუნდაძეს რამდენიმე არგუმენტი აქვს: თუ ქართულ ოცნებას საპრეზიდენტო კანდიდატი არ ეყოლება ეს გუნდის წვრებს დააბნევს; დამოუკიდებელი კანდიდატის განცხადებებზე მაინც მმართველ პარტიას მოუწევს პასუხების გაცემა; გამარჯვების შანსი ეძლევა ოპოზიციურ კანდიდატს, რომელიც გაპრეზიდენტების შემთხვევაში ვერ უზრუნველყოფს დემოკრატიულ პროცესს ქვეყანაში. ამასთან ხუნდაძე ამბობს, რომ მარტო არ არის და თავის არგუმენტებს მმართველ პარტიას გუნდის რამდენიმე წევრთან ერთად შესთავაზებს. 

გავრცელებული ინფორმაციით, „ქართული ოცნებამ“ შეიძლება მხარი დაუჭიროს დამოუკიდებელ კანდიდატს, სალომე ზურაბიშვილს.

დღეისათვის ცესკოში პრეზიდენტობის 14 კანდიდატია რეგისტრირებული. უკვე ცნობილია, რომ პრეზიდენტობისთვის, სალომე ზურაბიშვილის გარდა, დავით უსუფაშვილი, ზურაბ ჯაფარიძე, შალვა ნათელაშვილი, დავით ბაქრაძე და გრიგოლ ვაშაძე იბრძოლებენ.

საქართველოში საპრეზიდენტო არჩევნები 2018 წლის 28 ოქტომბერს ჩატარდება.