სალომე ზურაბიშვილი პრეზიდენტად კენჭს იყრის

საქართველოს პარლამენტის დამოუკიდებელმა წევრმა სალომე ზურაბიშვილმა თქვა, რომ შემოდგომაზე დაგეგმილ საპრეზიდენტო არჩევნებში კენჭს იყრის. ამის შესახებ მან სპეციალურად გამართულ ბრიფინგზე განაცხადა, რომელიც თავის სახლში გამართა.

"ეს არის ჩემი გადაწყვეტილება, გადაწყვეტილება, რომელზეც ბევრი ვიფიქრე. ეს არის ძალიან დიდი პასუხისმგებლობა. რაც არ უნდა ამაზე ფიქრობდეს ადამიანი და იცით, რომ ამაზე 2013 წელსაც ვფიქრობდი, გადაწყვეტილებამდე მისვლა ძალიან მძიმეა", - განაცხადა სალომე ზურაბიშვილმა.

"მე ვარ ვალდებული ჩემი წინაპრებისა და არა მარტო მათ წინაშე, ყველას წინაშე, ვინც 100 წლის წინ დამოუკიდებლობა გამოაცხადა.. პირველ რიგში ამ ქვეყნის სტაბილურობა მინდა... არ მახსენდება მსოფლიოში სხვა ქვეყანა, რომელმაც საუკუნენახევარში ამდენი ტერიტორია დაკარგა. უნდა გადავიდეთ ჩვენი ცხოვრების ახალ ეტაპზე. ქალი პრეზიდენტი შეიძლება იყოს უფრო "დამწყნარებელი" ვიდრე, პოლიტიკასა და კინკლაობაში ჩართული სხვადასხვა პოლიტიკოსი", - განაცხადა სალომე ზურაბიშვილმა.

საქართველოს პარლამენტის უპარტიო დეპუტატმა საფრანგეთის საელჩოს მოქალაქეობის დათმობის თხოვნით უკვე მიმართა.

66 წლის სალომე ზურაბიშვილი საქართველოს პოლიტიკურ ცხოვრებაში აქტიურად 2000-იანი წლების დასაწყისში ჩაება. ქართველი ემიგრანტების შთამომავალი და ცნობილი ქართველი მოღვაწის ნიკო ნიკოლაძის შვილთაშვილი პარიზში დაიბადა, შემდეგ ამერიკის შეერთებულ შტატებში ისწავლა და  კარიერის დიდი ნაწილი საფრანგეთის დიპლომატიურ სამსახურში სხვადასხვა პოზიციაზე საქმიანობას მიუძღვნა.

2003 წელს ის საქართველოში საფრანგეთის საგანგებო და სრულუფლებიან ელჩად დაინიშნა და ამ პოზიციაზე ერთი წელი იმუშავა. 2004-2005 წლებში მიხეილ სააკაშვილის მთავრობაში საგარეო საქმეთა მინისტრი იყო, თუმცა თანამდებობიდან მმართველი პარტიის დეპუტატებთან დაპირისპირების და მათი მოთხოვნის გამო გაათავისუფლეს. ამ უწყებაში მისი მუშაობის ყველაზე აღსანიშნავ ფაქტად რუსეთის საგარეო საქმეთა მინისტრთან, სერგეი ლავროვთან ბათუმიდან და ახალქალაქიდან რუსული სამხედრო ბაზების გაყვანის თაობაზე მოლაპარაკებები მიიჩნევა. 

2006 წელს სალომე ზურაბიშვილმა საკუთარი პარტია „საქართველოს გზა“ შექმნა, რომელიც მომდევნო წლებში სააკაშვილის ხელისუფლების წინააღმდეგ მიმართულ თითქმის ყველა საპროტესტო კამპანიაში და აქციაში მონაწილეობდა.

2007 წლის ნოემბრის მოვლენების ფონზე მიხეილ სააკაშვილის გადადგომის და საპრეზიდენტო არჩევნების გამოცხადების შემდეგ, ოპოზიციურმა კოალიციამ პრეზიდენტობის კანდიდატად ლევან გაჩეჩილაძე, ხოლო პრემიერმინისტრობის კანდიდატად სალომე ზურაბიშვილი დაასახელა. 2008 წლის 5 იანვრის სადავო საპრეზიდენტო არჩევნებში ისევ „ნაციონალური მოძრაობის“ ლიდერმა მიხეილ სააკაშვილმა გაიმარჯვა. 

2010 წლის ნოემბერში სალომე ზურაბიშვილმა ქართული პოლიტიკიდან დროებით წასვლის შესახებ განაცხადა და მიზეზად საქართველოში დემოკრატიის და ოპოზიციის საქმიანობისთვის პირობების არარსებობა დაასახელა. მან საქმიანობა გაეროს უშიშროების საბჭოს სანქციების კომიტეტის ირანის ექსპერტთა ჯგუფის ხელმძღვანელის პოზიციაზე განაგრძო.

საქართველოში ის 2012 წლის საპარლამენტო არჩევნებში ბიძინა ივანიშვილის კოალიცია „ქართული ოცნების“ გამარჯვების შემდეგ დაბრუნდა და 2013 წლის საპრეზიდენტო არჩევნებში დამოუკიდებელ კანდიდატად კენჭისყრა სცადა, თუმცა ცენტრალურმა საარჩევნო კომისიამ მას კანდიდტად რეგისტრაციაზე ორმაგი მოქალაქეობის გამო უარი უთხრა. ზურაბიშვილმა ცესკოს გადაწყვეტილება სასამართლოში გაასაჩივრა, თუმცა უშედეგოდ. 2013 წლის საპრეზიდენტო არჩევნებში კოალიცია „ქართული ოცნების“ კანდიდატმა გიორგი მარგველაშვილმა გაიმარჯვა.

2016 წლის საპარლამენტო არჩევნებზე სალომე ზურაბიშვილმა კენჭი დამოკიდებლად იყარა თბილისის მთაწმინდის მაჟორიტარულ ოლქში. მაშინ „ოცნებამ“ ამ ოლქში მას კონკურენტი არ დაუყენა. ზურაბიშვილმა გაიმარჯვა. პარლამენტში ის ემიგრანტების საკითხებს აქტიურად ლობირებდა.     

13 ივლისს გავრცელდა ინფორმაცია, რომ სალომე ზურაბიშვილი 2018 წლის საპრეზიდენტო არჩევნებში დამოუკიდებელ კანდიდატად კენჭისყრას აპირებდა; ითქვა, რომ სწორედ ის იქნებოდა კანდიდატი, რომელსაც მმართველი პარტია „ქართული ოცნება“ მხარს დაუჭერდა, რადგან ხელისუფლება ამ არჩევნებში თავისი კანდიდატის წარდგენას არ გეგმავს. ზურაბიშვილმა „ოცნებასთან“ მოლაპარაკებების შესახებ ინფორმაცია უარყო, ეს ცნობა მმართველ პარტიაშიც არ დაუდასტურებიათ.

თუმცა საქართველოს მოქმედი კონსტიტუციით, ზურაბიშვილი მხოლოდ იმ შემთხვევაში შეძლებდა საპრეზიდენტო არჩევნებში მონაწილეობას თუ საფრანგეთის მოქალაქეობაზე უარს იტყოდა, რადგან საქართველოს კონსტიტუციით ორმაგი მოქალაქეობის მქონე პირს ამ პოზიციაზე კენჭისყრის უფლება არ აქვს. საქართველოს საარჩევნო კანონმდებლობის თანახმად, სურვილის შემთხვევაში, მას მოქალაქეობიდან გასვლის თაობაზე უნდა მიემართა იმ ქვეყნისთვის, რომლის მოქალაქეცაა და კანდიდატად დარეგისტრირების დროს ეს მიმართვა გაკეთებული უნდა ჰქონდა.   

„ნაციონალურმა მოძრაობამ“ რამდენიმე ოპოზიციურ ჯგუფთან ერთად პრეზიდენტობის კანდიდატად გრიგოლ ვაშაძე წარადგინა, „ევროპულმა საქართველომ“ - დავით ბაქრაძე; „გირჩის“ კანდიდატია - ზურაბ ჯაფარიძე; თავისი გეგმების შესახებ ჯერჯერობით არაფერს ამბობს მოქმედი პრეზიდენტი გიორგი მარგველაშვილი, რომელიც „ოცნების“ მხრიდან კანდიდატის წარდგენას ელოდება. პრეზიდენტად კენჭს იყრის პარლამენტის ყოფილი თავმჯდომარე და „შენების მოძრაობის“ ლიდერი დავით უსუფაშვილი. საპრეზიდენტო კანდიდატად დარეგისტრირდა „ლეიბორისტული პარტიის“ თავმჯდომარე შალვა ნათელაშვილიც.

24 ივლისს, მმართველი პარტიის თავმჯდომარე ბიძინა ივანიშვილმა არ გამორიცხა, რომ „ქართული ოცნება“ ამ არჩევნებში დამოუკიდებელ კანდიდატს დაუჭერს მხარს. მმართველი პარტიის პოზიცია სავარაუდოდ დღევანდელი პოლიტსაბჭოს სხდომის შემდეგ გახდება ცნობილი, რომელზეც ხელისუფლების წარმომადგენლები საპრეზიდენტო არჩევნებში მონაწილეობის ვარიანტებს განიხილავენ.

საქართველოში საპრეზიდენტო არჩევნები 2018 წლის 28 ოქტომბერს ჩატარდება.