დეკლარაციის მიხედვით, აგვისტოში სალომე ზურაბიშვილის შემოსავლი 40 ლარი იყო

პრეზიდენტობის დამოუკიდებელ კანდიდატ სალომე ზურაბიშვილს 1 აგვისტოდან 21 აგვისტოს ჩათვლით, შემოსავლების სახით მხოლოდ 40 ლარი აქვს მიღებული. ზურაბიშვილის საარჩევნო კამპანიის ფონდის ფინანსური ანგარიშგების შესახებ ინფორმაცია სახელმწიფო აუდიტის სამსახურის ვებგვერდზეა გამოქვეყნებული.

ამ პერიოდში ზურაბიშვილმა 1740 ლარი დახარჯა, საიდანაც 400 ლარს ავტოსატრანსპორტო საშუალების იჯარის ხარჯი, 1300 ლარი კი ღონისძიებებზე გაწეული ხარჯია. 40 ლარს წარმოადგენს საბანკო მომსახურებაზე დახარჯული თანხა.

9 სექტემებრს მმართველი პარტიის ცენტრალურ ოფისში პოლიტსაბჭოს სხდომის დასრულების შემდეგ ცნობილი გახდა, რომ 2018 წლის საპრეზიდენტო არჩევნებზე „ქართული ოცნება - დემოკრატიული საქართველო“ დამოუკიდებელ, უპარტიო კანდიდატს, სალომე ზურაბიშვილს დაუჭერს მხარს.

რამდენიმე დღის წინ, პარლამენტის თავმჯდომარემ განაცხადა, რომ მას შემდეგ რაც „ქართული ოცნება“ გადაწყვეტდა თუ ვის დაუჭერდა მხარს საპრეზიდენტო არჩევნებში, ის თავის შემწირველებს ამ კანდიდატის ფინანსური მხარდაჭერისკენ მოუწოდებდა. ირაკლი კობახიძემ მაშინ დასძინა, რომ ამ არჩევნებში მეორე ტური მოსალოდნელი არ არის.

ივლისში ცნობილი გახდა, რომ მმართველი გუნდი 2018 წლის საპრეზიდენტო არჩევნებში საკუთარ კანდიდატს არ წარადგენდა.

6 აგვისტოს სალომე ზურაბიშვილმა განაცხადა, რომ პრეზიდენტად იყრის კენჭს. 16 აგვისტოს მან საარჩევნო კამპანია სიმბოლურად სოფელი დიდი ჯიხაიშიდან, თავისი წინაპრის ნიკო ნიკოლაძის სახლ-მუზუმიდან დაიწყო, საიდანაც ამომრჩევლებს მიმართა.

მანამდე, პრეზიდენტობის კანდიდატმა „ქრონიკისთვის“ მიცემულ ვრცელ ინტერვიუში თქვა, რომ არჩევის შემთხვევაში ავლაბრის რეზიდენციაში არ შევა და ამის მიზეზიც განმარტა.

საქართველოში საპრეზიდენტო არჩევნები 2018 წლის 28 ოქტომბერს გაიმართება.