საქართველოში ოპიუმის მოყვანის შესახებ ინფორმაცია ნარკოლოგებს პაციენტებისგან აქვთ

დღეს სააგენტო „ინტერპრესნიუსმა“ გაავრცელა ინფორმაცია, რომ სამხარაულის ნარკოლოგიური ექსპერტიზის სამმართველოს უფროსმა და ნარკომანიის პრევენციის ცენტრის გენერალური დირექტორის მოადგილე გური მენაბდიშვილმა „კვირის პალიტრასთან“ ინტერვიუში თქვა, რომ საქართველოშიც დაიწყეს ოპიუმის მოყვანა და ბაზარზე უკვე გამოჩნდა ქართული ჰეროინი.

მენაბდიშვილი პრესასთან გაკეთებული განცხადებების გამო შსს-ში გამოკითხვაზე დაიბარეს, სადაც დღის განმავლობაში მივა.

„ქრონიკა“ იმით დაინტერესდა, თუ რა ფაქტებზე დაყრდნობით აცხადებენ ნარკოლოგები, რომ საქართველოში ოპიუმის მოყვანა დაწყებულია. მათი თქმით, კლიმატის გამო საქართველოს რეგიონებში საძილე ყაყაჩოს კულტივირება შესაძლებელია. თუმცა მოჰყავთ თუ არა ის ნამდვილად ქვეყანაში, სპეციალისტების ნაწილი ამ თემაზე ლაპარაკისგან თავს იკავებს, ნაწილს კი, მათ შორის ნარკოლოგიური ექსპერტიზის სამართთველოს უფროს გური მენაბდიშვილს მსგავს ცნობებს პაციენტები აწვდიან.

„ადამიანებმა რომლებიც მოიხმარენ ნაკოტიკულ საშუალებებს, ჩვენს ქვეყანაშიც და არამხოლოდ ჩვენთან, ძირითადად არ იციან რას მოიხმარენ, სადაურია, რა წარმომავლობისაა... ამას ყველაფერს ეუბნება გადამყიდველი. გადამყიდველმა კი არ არის გამორიცხული მას უთხრას რომ ეს არის საქართველოში ქართული ოპიუმისგან დამზადებული ჰეროინი“, - ამბობს მენაბდიშვილი.