სალომე ზურაბიშვილი ოპონენტებს დებატებში იწვევს

პრეზიდენტობის დამოუკიდებელმა კანდიდატმა სალომე ზურაბიშვილმა ოპონენტები დებატებზე გამოიწვია. ამის შესახებ მან ცოტა ხნის წინ საკუთარ შტაბბინაში გამართულ პრესკონფერენციაზე განაცხადა.

მან თავის მოწინააღმდეგეებს „შავი ძალები“ უწოდა და განმარტა, რომ მის მიმართ გამოთქმული შეურაცხყოფების ფონზე წესით დებატებს არ უნდა თანხმდებოდეს, მაგრამ ის პირიქით, დებატების ინიციატივით გამოდის, თუმცა ის ამას ნეიტრალურ ტერიტორიაზე მოითხოვს.

სალომე ზურაბიშვილის მიმართ გამოთქმული შეურაცხყოფის გამო, კომუნიკაციების მარეგულირებელი კომისიის გადაწყვეტილებით ეთერებიდან 3 საარჩევნო კლიპი მოიხსნა.

დამოუკიდებელ კანდიდატს საპრეზიდენტო არჩევნებში მმართველი პოლიტიკური ძალა უჭერს მხარს. „ქართულმა ოცნებამ“ ამის შესახებ ოფიციალურად 9 სექტემბერს განაცხადა.

სალომე ზურაბიშვილი საქართველოს საგარეო საქმეთა მინისტრი იყო 2004 წლის მარტიდან 2005 წლის ოქტომბრამდე. სალომე ზურაბიშვილი როგორც საგარეო საქმეთა მინისტრი იყო მთავარი მომლაპარაკებელი, რომელმაც შეთანხმებას მიაღწია საქართველოდან რუსული ბაზების გაყვანის შესახებ. ხელშეკრულებაზე ხელისმომწერი პირი რუსეთის მხრიდან იყო რუსეთის საგარეო საქმეთა მინისტრი სერგეი ლავროვი (2005 წლის 19 მაისი).

ის დაიბადა და გაიზარდა საფრანგეთში, ქართველი ემიგრანტების ოჯახში. იგი არის ქართველი საზოგადო და პოლიტიკური მოღვაწის ნიკო ნიკოლაძის შვილიშვილის შვილი.

ამჟამად სალომე ზურაბიშვილი არის მეცხრე მოწვევის პარლამენტის დამოუკიდებელი, არაპარტიული დეპუტატი. 

საქართველოს საპრეზიდენტო არჩევნები 2018 წლის ოქტომბერში გაიმართება.