ევროპული საქართველოს პრეზიდენტობის კანდიდატი სპორტის სასახლეში მხარდამჭერებს ხვდება

პარტია „ევროპული საქართველო“ თბილისის სპორტის სასახლეში მხარდამჭერებთან შეხვედრას მართავს.

პარტიის მხარდამჭერები საქართველოს ყველა რაიონიდან ჩამოვიდნენ. საზოგადოებას სიტყვით მიმართავენ პარტიის ლიდერები.

"ქართული ოცნება დღეს ცდილობს გვაჩვენოს, რომ ქართველებს არ გვაქვს კარგი არჩევანი, მომავალზე ორიენტირებული არჩევანი და რომ ჩვენი არჩევანი არის ცუდს და უარესს შორის. ჩვენი არჩევანია იმ ჭაობს, უიმედობას და უპერსპექტიობას შორის, სადაც დღეს ვართ და არეულობას, შურისძიებას და წარსულის დაბრუნებას შორის. ეს არის იარაღი, რომელიც დღეს ხელისუფლებას აქვს. სამწუხაროა, რომ ამ მიზნით ხელისუფლება იყენებს ოპოზიციის ნაწილს, მათ შორის იმ ნაწილს, სადაც წლების განმავლობაში ჩვენც ვიყავით, საუბარი მაქვს „ნაციონალურ მოძრაობაზე“. წარსულის შეცდომების არაღიარება, აგრესიული რიტორიკა, მკაფიო დაპირების არარსებობა, რომ მომავალში შურისძიება არ იქნება, არ იქნება რევანში და არეულობა - ეს ყველაფერი ეხმარება ხელისუფლებას, წარმოაჩინოს, რომ ქვეყანა დგას ორი ალტერნატივის წინაშე, ან იქნება სალომე ზურაბიშვილი და ჭაობი, ან იქნება „ნაციონალური მოძრაობა“ და არეულობა და რევანში,"- თქვა დავით ბაქრაძემ.

პარტიის ინფორმაციით, „ევროპულ საქართველოსა“ და მის კანდიდატს, დავით ბაქრაძეს მხარდაჭერას უცხადებს ცნობილი ლიტველი დისიდენტი და ლიტვის პირველი პრეზიდენტი ვიტაუტას ლანდსბერგისი. 

საპრეზიდენტო არჩევნები საქართველოში 28 ოქტომბერს გაიმართება.