შშმ პირებისთვის სოციალური პაკეტის 20 ლარით გაზრდაა დაგეგმილი

მთავრობა მეორე ჯგუფის შეზღუდული შესაძლებლობის მქონე პირებისთვის სოციალური პაკეტის 20 ლარით გაზრდას, ხოლო აუტისტური სპექტრის დარღვევის მქონე ბავშვთა ადრეული განვითარების პროგრამის მთელი საქართველოს მასშტაბით განხორციელებასა და ბენფიციართა ასაკის 18 წლამდე გაზრდას გეგმვას. ამის შესახებ 1tv.ge წერს.

როგორც ჯანდაცვის მინისტრის დავით სერგეენკო ამბობს, ეს საკითხები დღეს მთავრობის ადმინისტრაციაში, პრემიერმინისტრი მამუკა ბახტაძისა და შეზღუდული შესაძლებლობების მქონე პირების შეხვედრაზე განიხილეს. სერგეენკოს თქმით, მასსა და ფინანსთა მინისტრ ივანე მაჭავარიანს სოციალური პაკეტის გასაზრდელად ფინანსური რესურსის მოძიება დაევალათ.

„ეს ეხება  75 000-ზე მეტ ჩვენს თანამოქალაქეს და რა თქმა უნდა, მათი საჭიროება უნდა გავითვალისწინოთ. ჯანდაცვისა და ფინანსთა სამინისტროებს ექნებათ დავალება, რომ აუცილებლად მოვიძიოთ ეს რესურსი მომავალი წლის ბიუჯეტში,

ჩვენთვის ძალიან მნიშვნელოვანია, რომ ბოლო 5-6 წლის განმავლობაში ამ მიმართულების განვითარებისთვის გვაქვს გარკვეული რესურსები გამოყოფილი, იზრდება სოციალური პაკეტიც, თუმცაღა ისიც გვესმის, რომ ეს საკმარისი არ არის და მეტია გასაკეთებელი. საჭიროა განვითარებული ქვეყნების პრაქტიკა უკეთ გავაცნობიეროთ და დავნერგოთ ევროპული მოდელი, გავზარდოთ ადგილობრივი  მუნიციპალიტეტების ჩართულობა ამ პროცესში, რაც უფრო ინკლუზიურს გახდის ამ მიმართულებას“, – განაცხადა მამუკა ბახტაძემ.

შეხვედრაზე ასევე ზოგადად შშმ პირთა მიმართ პოლიტიკა და სამოქმედო გეგმა განიხილეს, რომელიც განახლებას საჭიროებს.