ბიზნესომბუდსმენი პარლამენტს თამბაქოს რეალიზაციისას დარღვევებზე დაწესებული სანქციების შემსუბუქებას სთხოვს

ბიზნესომბუდსმენი პარლამენტს თამბაქოს ნაწარმის ობიექტის გარედან ხილვადად რეალიზაციისთვის სანქციების შემსუბუქების თხოვნით მიმართავს.

საქართველოს ადმინისტრაციულ სამართალდარღვევათა კოდექსში დღეს მოქმედი ნორმით თამბაქოს ნაწარმის, თამბაქოს აქსესუარის ან/და თამბაქოს მოხმარებისთვის განკუთვნილი მოწყობილობის ვიტრინაზე, ვიტრაჟზე, დახლზე, თაროზე ან სხვაგვარად რეალიზაცია, ისე, რომ იგი ხილვადი იყოს შესაბამისი ობიექტის გარედან, – იწვევს დაჯარიმებას 2 000 ლარის ოდენობით, ხოლო სამართალდარღვევის განმეორებით ჩადენის შემთხვევაში 4 000 ლარის ოდენობით

საქართველოს ბიზნესომბუდსმენის აპარატის განცხადებით, მათ (ა)იპ ქართულ მაღაზიათა ასოციაციამ მიმართა. ასოციაციის წევრების სურვილია, ცვლილება შევიდეს საქართველოს ადმინისტრაციულ სამართალდარღვევათა კოდექსის 1553 მუხლის მე-17 - მე-18 ნაწილებში და თამბაქოს ნაწარმის, თამბაქოს აქსესუარის ან/და თამბაქოს მოხმარებისთვის განკუთვნილი მოწყობილობის ვიტრინაზე, ვიტრაჟზე, დახლზე, თაროზე ან სხვაგვარად რეალიზაცია, ისე, რომ იგი ხილვადი იყოს შესაბამისი ობიექტის გარედან, – პირველ ჯერზე სანქციის სახით იწვევდეს გაფრთხილებას, ხოლო განმეორების შემთხვევაში - ჯარიმას 500 ლარის ოდენობით.

ბიზნესომბუდსმენის ინფორმაციით, გასათვალისწინებელია, რომ ქართულ ბაზარზე მოქმედი 12 000 მაღაზიიდან 7 500-მდე მცირე მაღაზიაა, რომელთა წლიური წმინდა მოგება არ აღემატება რამოდენიმე ათას ლარს. შესაბამისად, მათთვის სანქციის სახით 2000 ლარის ოდენობით ჯარიმის დაკისრება წარმოადგენს შეუსაბამოდ მაღალ სანქციას და მისი პრაქტიკაში გამოყენება გამოიწვევს მაღაზიების პარალიზებას, ვინაიდან ისინი არსებული შემოსავლის პირობებში ვერ შეძლებენ ამ ოდენობის ჯარიმის გადახდას.

„საქართველოს ბიზნესომბუდსმენის აპარატი იზიარებს ა(ა)იპ ქართულ მაღაზიათა ასოციაციის განცხადებაში დასმული საკითხის მნიშვნელობას და მისი მხარდაჭერის საჭიროებას. შესაბამისად, „საქართველოს ბიზნესომბუდსმენის შესახებ“ საქართველოს კანონის მე-9 მუხლის საფუძველზე, გთხოვთ, კომიტეტის სხდომაზე განიხილოთ აღნიშნული საკითხი და 2018 წლის 9 აგვისტოს N07-3/214 საკანონმდებლო ინიციატივაში მისი ასახვის შესაძლებლობა“ - წერია ბიზნესომბუდსმენის განცხადებაში.