თამბაქოს კონტროლის ალიანსი პარლამენტში მომზადებული საკანონმდებლო ცვლილებების ნაწილს არ ეთანხმება

თამბაქოს კონტროლის ალიანსმა გაავრცელა განცხადება, რომელშიც წერია, რომ ალიანსი ემიჯნება პარლამენტში, ჯანდაცვის კომიტეტის მიერ მომზადებული საკანონმდებლო ცვლილების ზოგიერთ პუნქტს, რომელთა მიხედვით თამბაქოს კონტროლის კანონში ცვლილებები იგეგმება.

„კერძოდ, ვეწინააღმდეგებით სათამაშო ბიზნესის ასოციაციის მოთხოვნით, მოწევის დაშვებას იმ შენობებში, სადაც სათამაშო ბიზნესია განთავსებული და ასევე მოწევის დაშვებას თეატრში, სცენაზე, სპექტაკლის მიმდინარეობის დროს.

ცვლილებების პროექტის ინიციატორები და მათი მხარდამჭერები ცრუობენ, როდესაც აცხადებენ, რომ კაზინოებში მოწევის დაშვებამ არათანაბარკონკურენტულ გარემოში ჩააყენა სათამაშო ბიზნესის სხვა მიმართულებები, რამაც თურმე მათი კლიენტურის სამორინეებში გადინება გამოიწვია. აღსანიშნავია, რომ კანონი ძალაშიც კი არ იყო შესული, როდესაც სათამაშო ბიზნესის ასოციაციამ ამ პრეტენზიით პარლამენტს მიმართა. დიახ, სათამაშო ბიზნესის ასოციაციამ პარლამენტს პირველ მაისამდე, კანონის აღსრულების დაწყებამდე შესჩივლა, კაზინოები კლიენტურას გვართმევენო. იმ დროისთვის შეუძლებელია კონკურენციის ნორმა დარღვეულიყო და ამის გამო კლიენტურას, თუნდაც სლოტკლუბიდან სამორინისკენ, კაზინოებისკენ აეღო გეზი. მეტიც, არ არსებობს მტკიცებულებები, რომელთა შესაბამისად დადასტურდება, რომ კანონის აღსრულების შემდეგ დაირღვა კონკურენციის ნორმები.

ალოგიკურია და ჭირვეულობას ჰგავს ზოგიერთი პარლამენტარის მხრიდან თეატრებში სპექტაკლებზე თამბაქოს ნაწარმის გამოყენების მოთხოვნა იმ მოტივით, რომ თურმე, თამბაქოს ნაწარმის ბოლის გარეშე რეჟისორი სცენაზე საკუთარ ჩანაფიქრს სრულფასოვნად ვერ წარმოადგენს. გონივრული ეჭვი გვაქვს, რომ ამ მოთხოვნის უკან დგას თამბაქოს ინდუსტრია, რომელიც უკვე წლებია აფინანსებს ზოგიერთ ქართულ თეატრს. წინააღმდეგ შემთხვევაში გაუგებარია, რატომ არ შეიძლება გამოიყენოს ქართველმა რეჟისორმა უახლესი ტექნოლოგიით დამზადებული რეკვიზიტები, რომელთა საშუალებით მათი უცხოელი კოლეგები წარმატებით ახერხებენ მოწევის უზუსტეს იმიტაციას და არანაირ ზიანს არ აყენებენ მსახიობებს (რომლებიც იძულებული არიან მთელი სპექტაკლის განმავლობაში ეწეოდნენ) და მაყურებელს, რომელიც თეატრში ესთეტიკური სიამოვნების მისაღებად მიდის და არა ჯანმრთელობის დასაზიანებლად. კატეგორიულად მიგვაჩნია, რომ მსგავსი კანონში ცვლილება საჭირო არ არის.

სამწუხაროდ, უკვე განვლილი საკომიტეტო მოსმენებიდან გამომდინარე ვშიშობთ, რომ დღეს, პარლამენტში კიდევ ერთხელ მხარს დაუჭერენ ქვეყნის მოსახლეობის ეკონომიკურად დამანგრეველ სათამაშო ბიზნესს და თამბაქოს ინდუსტრიას, რითაც დაიწყებენ ერთ-ერთი (თუ ერთადერთი არა) ყველაზე პოპულარული კანონის შესუსტებას და დისკრედიტაციას“ - წერია თამბაქოს კონტროლის ალიანსის განცხადებაში.

2018 წლის პირველი მაისიდან საზოგადოებრივი დანიშნულების ყველა შენობა-ნაგებობაში თამბაქოს მოწევა აიკრძალა, მათ შორის კაფეებსა და რესტორნებში.

მოწევა შეიზღუდა გარე სივრცეებშიც, აიკრძალა თამბაქოს რეკლამა და სპონსორობა.

1 სექტემბრიდან „თამბაქოს კონტროლის შესახებ“ კანონის თანახმად,  აკრძალულია თამბაქოს ნაწარმის, თამბაქოს აქსესუარის ან თამბაქოს მოხმარებისთვის განკუთვნილი მოწყობილობის რეალიზაცია და განლაგება ვიტრინაზე, ვიტრაჟზე, დახლზე, თაროზე ან სხვაგვარად, ისე, რომ იგი ხილვადი იყოს გარედან. დარღვევაზე ჯარიმა 2 000 ლარი, განმეორებისას კი 4 000 ლარია.