კობახიძე მარგველაშვილს საბოტაჟის მოწყობაში ადანაშაულებს

პარლამენტის თავმჯდომარე გიორგი მარგველაშვილს საბოტაჟში ადანაშაულებს. ინფორმაციას 1tv ავრცელებს.

 “არ წყდება ტყუილები, არ წყდება შეტევა პარლამენტზე, კომისიაზე, არ წყდება საბოტაჟი საქართველოს პრეზიდენტის მხრიდან“, - განაცხადა ირაკლი კობახიძემ პარლამენტის იურიდიულ საკითხთა კომიტეტის სხდომაზე სიტყვით გამოსვლის დროს.

მისივე თქმით, პრეზიდენტის მხრიდან ისმის პირდაპირი ტყუილი ვენეციის კომისიის წინასწარ დასკვნასთან დაკავშირებით.

“გვქონდა ინფორმაცია იმის თაობაზე, რომ გაეგზავნა საქართველოს პრეზიდენტს  შესაბამისი დოკუმენტი ვენეციის კომისიის მხრიდან და ამასთან დაკავშირებით გვაქვს დამადასტურებელი შესაბამისი დოკუმენტი. გარდა ამისა, როდესაც ფიქრია ჩიხრაძემ დაიწყო თავისი პრესკონფერენცია კონსტიტუციასთან დაკავშირებით, მისი პირველი სიტყვა იყო გავეცანით ვენეციის კომისიის პირველად დოკუმენტს. ეს თვითონ მან ბრძანა და დაადასტურა, რომ ჰქონდა დოკუმენტი მიღებული, გაეცნო ამ დოკუმენტს და ამის საფუძველზე ჩაატარა ბრიფინგი. ჩვენ დღეს მოვისმინეთ პირდაპირი ტყუილი. ამაში ქალბატონ ანას ვერ დავადანაშაულებ, როცა საუბრობს საპარლამენტო მდივანი, საუბრობს არა ქალბატონი ანა, არამედ პრეზიდენტი. ძალიან სამწუხაროა, რომ საქართველოს პრეზიდენტის მხრიდან ასეთ რამეებს ვისმენთ ხოლმე, ძალიან დამღლელია ყველაფერი, რაც ხდება საქართველოს პრეზიდენტის მხრიდან", - განაცხადა ირაკლი კობახიძემ. 

მისივე თქმით, საქართველოს პრეზიდენტი ოთხი თვის განმავლობაში საკონსტიტუციო კომისიის არც ერთ სხდომას არ დასწრებია და არ მიუღია მონაწილეობა; პრეზიდენტის მხრიდან ისმის ტყუილები და შეტევა საქართველოს პარლამენტზე. 

კობახიძის აღშფოთება პრეზიდენტის საპარლამენტო მდივნის დღევანდელმა განცხადებამ გამოიწვია. ანა დოლიძე ამბობს, რომ ვენეციის კომისიის წინასწარი დასკვნა პრეზიდენტს მიღებული არ აქვს. მისი თქმით, ამ თემაზე ნებისმიერი ინსინუაციები, არასწორია.

5 ივნისს, პარლამენტის თავმჯდომარემ განაცხადა, რომ პრეზიდენტის განცხადებებზე კომენტარს აღარ გააკეთებდა.  

საკონსტიტუციო ცვლილებებზე ვენეციის კომისიის წინასწარი დასკვნა 8 ივნისს გასაჯაროვდა. ვენეციის კომისია დასკვნას ივნისის შუა რიცხვებში დაამტკიცებს.