კობახიძე: ვენეციის კომისიის რეკომენდაციებს კანონპროექტში სრულად ავსახავთ

„ხვალისთვის ველოდებით ვენეციის კომისიის დასკვნას კანონპროექტთან დაკავშირებით, რაც მოგვცემს საშუალებას, რომ პარასკევამდე სრულად ავსახოთ ყველა შესაბამისი რეკომენდაცია ჩვენს კანონპროექტში”, - ამის შესახებ ჟურნალისტებს საქართველოს პარლამენტის თავმჯდომარემ უზენაესი სასამართლოს მოსამართლეების შერჩევის პროცედურებთან დაკავშირებულ კანონპროექტზე საუბრისას განუცხადა. 

ირაკლი კობახიძემ პროცესის შესახებ ილაპარაკა და კიდევ ერთხელ აღნიშნა, რომ მმართველ გუნდს კანონპროექტის მეორე მოსმენით მიღება ორი კვირის წინ სურდა, რადგან უზენაეს სასამართლოში სირთულეებია.

"დღეს არის სულ 10 მოსამართლე, ივნისში იქნება 8 მოსამართლე უზენაეს სასამართლოში. სისხლის სამართლის მიმართულებით იქნება მხოლოდ ერთი მოსამართლე და ადმინისტრაციული სამართლის მიმართულებითაც იქნება ერთი მოსამართლე. ორი საკვანძო მიმართულება რომ ავიღოთ, უზენაეს სასამართლოს ეყოლება თითო მოსამართლე, რაც კონკრეტულ პრობლემებთანაა დაკავშირებული. საბოლოო ჯამში, ეს კონკრეტული პრობლემები დაკავშირებულია კონკრეტული ადამიანების უფლებებთან. მაგალითად, იმის გამო, რომ ერთი მოსამართლე  იქნება სისხლის სამართლის პალატაში, ადამიანებს მოუწევთ ორი-სამი თვით მეტხანს დარჩენა წინასწარ პატიმრობაში, ან იმის გამო, რომ ადმინისტრაციულ პალატაში იქნება ერთი მოსამართლე, ბევრი ადამიანი ვერ მოახერხებს საკუთარი დარღვეული უფლების აღდგენას და მაგალითად, გადახდილი ჯარიმის უკან დაბრუნებას და ა.შ. ბუნებრივია, ათასობით ადამიანის ბედი, ამ კუთხით, პრობლემის ქვეშ არ უნდა დავაყენოთ, თუ შეგვიძლია, რომ უფრო სწრაფად განვიხილოთ ეს კანონპროექტი.

ვენეციის კომისიას  გავაცანით ჩვენი გრაფიკი. ჯერ ვუთხარით, რომ ორი კვირით ადრე გვინდოდა კანონპროექტის მიღება. გვითხრეს, რომ შეუძლებელი იყო. გავითვალისწინეთ ვენეციის კომისიის თხოვნა და ორი კვირით გადავწიეთ განხილვის ვადა, თუმცა იქვე აღვნიშნეთ, რომ არაუგვიანეს 19 აპრილისა მიიღებოდა კანონპროექტი, რაც მისაღები აღმოჩნდა  ვენეციის კომისიისთვის და ისინი დაგვთანხმდნენ სამშაბათისთვის, ანუ ხვალისთვის საკუთარი დასკვნის წარმოდგენას იმისათვის, რომ ამ რეკომენდაციების პლენარულ განხილვამდე საკმარისი დრო გვქონდეს”, - განაცხადა პარლამენტის თავმჯდომარემ.

ირაკლი კობახიძე  ვენეციის კომისიისგან დადებით დასკვნას ელოდება. მისი შეფასებით, მმართველი გუნდის მიერ მომზადებული კანონპროექტი არა მხოლოდ შეესაბამება სამართლებრივ პროცედურებს, არამედ ასჯერ აღემატება მინიმალურ სამართლებრივ სტანდარტს.

ჟურნალისტებთან საუბრისას, ირაკლი კობახიძე გამოეხმაურა სახალხო დამცველის გადაწყვეტილებას, გამოიყენოს საქართველოს პარლამენტის რეგლამენტით განსაზღვრული კომპეტენცია და დეპუტატებს უზენაესი სასამართლოს მოსამართლეთა არჩევის პროცედურებთან დაკავშირებულ კანონპროექტთან დაკავშირებით მოხსენებით მიმართოს.

„სახალხო დამცველის მონაწილეობას კანონშემოქმედებით პროცესში რეგლამენტი ამ სახით არ ითვალისწინებს.  შესაბამისად,  ეს შეუძლებელია. რეგლამენტის თანახმად, გამოდის მომხსენებელი, რომელიც უნდა იყოს დეპუტატი ამ შემთხვევაში, გამოდის თანამომხსენებელი, ასევე დეპუტატი და გამოდიან საპარლამენტო სუბიექტების წარმომადგენლები. სახალხო დამცველის მონაწილეობას არანაირი ფორმით არ ითვალისწინებს რეგლამენტი”,- განმარტა ირაკლი კობახიძემ.

20 მარტს უზენაესი სასამართლოს მოსამართლეების არჩევის წესთან დაკავშირებით უმრავლესობის მიერ მომზადებულ კანონპროექტს პირველი მოსმენით მხარი დაუჭირეს.

21 იანვარს უზენაესის მოსამართლეობის სადავო კანდიდატებმა მოსამართლეებად არჩევაზე უარი თქვეს. 

10 მთავარი პრინციპი, რომელსაც მოსამართლეების დანიშვნაზე უმრავლესობის პროექტი ეფუძნება, შეგიძლიათ იხილოთ ბმულზე.