ბავშვთა სამყაროს მესაკუთრეები დაკავებული დირექტორის მხარდამჭერ აქციას მართავენ

„ბავშვთა სამყაროს“ მესაკუთრეები გიორგი მაჭავარიანს მხარდაჭრას უცხადებენ. 100-მდე აქციონერი ამ წუთებში პროკურატურასთან მართავს აქციას. მათი შეფასებით, მაჭავარიანი უდანაშაულოა და ის ერთგვარ განტევების ვაცად იქცა.

„ადამიანი როგორც საკუთარ სახლს არ დაწვავს, ასევე არ დაწვავდა გიორგი მაჭავარიანი „ბავშვთა სამყაროს“, რომელმაც შენობა რამდენიმე თვით ადრე ჩვენთან ერთად გაარემონტა“, - ამბობს აქციის ერთ-ერთი მონაწილე დოდო ნიკოლეიშვილი.

პროკურატურის შენობასთან დღეს ასევე „ბავშვთა სამყაროს“ ხანძრის შედეგად, დაზარალებულთა აქციაც მიმდინარეობს. დაზარალებულები პროკურატურის მიერ მაჭავარიანის დაკავებას იწონებენ და სხვა დამნაშავეების დასჯასაც ითხოვენ.

„ბავშვთა სამყაროს“ დირექტორი და უსაფრთხოების თანამშრომელი პროკურატურამ გუშინ დააკავა. მაჭავარიანი ბრალს არ აღიარებს.

თბილისში, თევდორე მღვდლის ქუჩაზე არსებული „ბავშვთა სამყარო“ 30 იანვარს დაიწვა, რამაც მოვაჭრეების პროდუქცია, ფაქტობრივად, სრულად გაანადგურა. დაზარალებულებმა რამდენიმე საპროტესტო აქცია მოაწყვეს და ხელისუფლებას მოთხოვნები წაუყენეს. მოგვიანებით, დაზარალებულები მერიის მიერ შეთავაზებულ, 3000 ლარიან კომპენსაციას დათანხმდნენ.