მეუფე დიმიტრი დაკავებულ დეკანოზთან ახლო კავშირს უარყოფს

ბათუმისა და ლაზეთის მიტოპოლიტი დიმიტრი შიოლაშვილი ბრალდებულ დეკანოზ გიორგი მამალაძესთან მისი ახლო კავშირების შესახებ გავრცელებულ ინფორმაციას არ ადასტურებს. „კვირის პალიტრასთან“ ინტერვიუში მეუფე ამბობს, რომ გიორგი მამალაძე ბათუმში მოძღვრად მან აკურთხა, თუმცა თბილისში დეკანოზი მისგან დამოუკიდებლად მოქმედებდა.

„არავინ მკითხა აზრი, არც საქმის კურსში ჩამაყენეს ერთი წლის წინ, რომ დეკანოზ გიორგი მამალაძის დანიშვნას ერთ-ერთ ხელმძღვანელ პოზიციაზე აპირებდნენ. ეს მხოლოდ მას შემდეგ შევიტყვე, რაც ყველაფერი უკვე გადაწყვეტილი იყო“, - განაცხადა მეუფე დიმიტრიმ.

მიტროპოლიტი აცხადებს, რომ უდანაშაულობის პრეზუმფციას ვერ დაარღვევს და ვიდრე ბრალი არ დაუმტკიცდება, დეკანოზ გიორგი მამალაძეს უდანაშაულოდ მიიჩნევს, თუმცა თუ ეს დამტკიცდა, მეუფის თქმით, მამალაძე მთელ ამ პროცესს მარტო ვერ დაგეგმავდა. მეუფე დიმიტრი სასულიერო ან საერო პირის ჩართულობაზე მიუთითებს.

ამასთან, მეუფე დიმიტრი ჭყონდიდის მიტროპოლიტს პეტრე ცაავას ღიად აკრიტიკებს. ის ამბობს, რომ არც მეუფე პეტრეს და არც ვინმე სხვა აქვს უფლება პატრიარქს უთხრას, რომ შორენა თეთრუაშვილი მრჩევლად არ ჰყავდეს.

"სხვათა შორის როდესაც მეუფე პეტრემ პირველად მსგავსი შინაარსის განცხადება გააკეთა, გერმანიაში ყოფნისას მივწერე, რომ მისი გამოსვლები ეკლესიის კეთილდღეობას არ ემსახურება. მიპასუხა - ვწუხვარ, რომ ასე ფიქრობო", - ამბობს ინტერვიუში მეუფე დიმიტრი.

მიტროპოლიტი სამწუხაროს უწოდებს მეუფე პეტრეს მიერ გაკეთებულ განცხადებებს.

"მასთან ცუდი ურთიერთობა არასოდეს მქონდა, პირიქით დღემდე კარგ ურთიერთობას ვინარჩუნებ, თუმცა ეს არ ნიშნავს, რომ თუ ჩემი გადმოსახედიდან შეფასებებში არ ვეთანხმები, ამაზე ღიად საუბარს მოვერიდები. ასეთები ვართ ადამიანები - დემოკრატიაა, ყველას აქვს უფლება საკუთარი აზრი ღიად დააფიქსიროს", - აცხადებს ბათუმისა და ლაზეთის მიტროპოლიტი.