წულუკიანი: თუ სტრასბურგის სასამართლო ხარვეზს დაადგენს, ჯარიმას დაგვაკისრებს

საქართველოს იუსტიციის მინისტრი თეა წულუკიანი "იმედის დროსთვის" მიცემულ ინტერვიუში სამაუწყებლო კომპანია "რუსთავი 2"-ისა და სტრასბურგის სასამართლოში გასაგზავნი მოსამართლეების საკითხზე საუბრობს. ინტერვიუს, რომელიც ჟურნალისტმა ქეთი ბრაჭულმა ჩაწერა, IMEDINEWS-ი გთავაზობთ.

წულუკიანი ინტერვიუში ამბობს, რომ სტრასბურგის სასამართლოს მიერ "რუსთავი 2"-თან დაკავშირებით მიღებული გადაწყვეტილება ახალ პრეცედენტს ქმნის, რაზეც საქართველოს ხელისუფლება, როგორც მხარე, წარდგენილ მასალებში აპელირებდა. 

მინისტრი, ასევე, ამბობს, რომ ახალი პრეცედენტის დადგომას სტრასბურგის სასამართლოში 17 მოსამართლის, ანუ ზედა პალატის უფრო ლეგიტიმური გადაწყვეტილება ესაჭიროება. 

"ძალიან ბევრ ქვეყანაში გამოითქვა კითხვები, თუ როგორ მოხდა ისე, რომ 1959 წლიდან დღემდე არსებული პრეცედენტი დაირღვა. სტრასბურგის სასამართლო პრეცედენტული სასამართლოა და იმისთვის, რომ პრეცედენტი დაირღვეს და ახალი პრეცედენტი დადგეს, ამისათვის 17 მოსამართლის, ანუ დიდი პალატის უფრო ლეგიტიმური გადაწყვეტილებაა საჭირო. მაგრამ პრეცედენტს უარი უთხრა ჯერ მორიგე მოსამართლემ, შემდეგ 7 მოსამართლისგან შემდგარმა პალატამ და მიიღო აბსოლუტურად უპრეცედენტო გადაწყვეტილება. სწორედ ამას ეყრდნობოდა, ძირითადად, ჩვენი არგუმენტი, რომ პრეცედენტის შეცვლა ასე არ შეიძლება, რომ არ შეიძლება, კერძო დავაზე მიიღონ ამ ტიპის შეჩერების გადაწყვეტილება, რაზეც მრავალი ათეული წლის მანძილზე სტრასბურგის სასამართლო უარს ამბობდა", - აცხადებს წულუკიანი. 

იუსტიციის მინისტრი ქიბარ ხალვაშის მიერ წლების წინ სტრასბურგის სასამართლოსთვის მიმართვის ამბავსაც იხსენებს. მისი თქმით, მაშინ სტრასბურგის სასამართლომ, იგივე მოთხოვნაზე, რაზეც დღეს "რუსთავი 2"-ს თანხმობა მისცა, ხალვაშს უარი უთხრა.

"მე მახსოვს, იქ ვმუშაობდი, როდესაც ქიბარ ხალვაშმა, რომლის საკუთრების უფლებაც წინა ხელისუფლების დროს ირღვეოდა, შემოიტანა მსგავსი ტიპის ღონისძიებაზე მოთხოვნა და მაშინ სტრასბურგის სასამართლომ მას უთხრა უარი, იმიტომ, რომ პრეცედენტი ამას არ უშვებდა. ახლა არის მცდელობა პრეცედენტის შეცვლისა და ჩვენი მომდევნო სამართლებრივი დავაც იქნება სწორედ ამაზე აქცენტირებული", - ამბობს წულუკიანი.

მინისტრის განმარტებით, სტრასბურგის სასამართლო არ არის მეოთხე ინსტანციის სასამართლო და მას არ აქვს უფლებამოსილება, შეცვალოს უზენაესი სასამართლოს გადაწყვეტილება ან საქმე ხელახალ წარმოებაში დააბრუნოს. "მას ერთადერთი, შეუძლია თქვას, დაირღვა თუ არა რუსთავი 2-ის გამოხატვის თავისუფლება, ან რომელიმე ინსტანციის სასამართლოში რაიმე სახის ხარვეზი ხომ არ არსებობდა. თუ ასეთი ხარვეზი არსებობდა, ამის სანაცვლოდ ის დაადგენს კომპენსაციის ოდენობას", - ამბობს წულუკიანი. 

მინისტრი "რუსთავი 2"-ს გამარჯვებულად არ თვლის, რადგან ეს მხოლოდ და მხოლოდ პროცედურული გადაწყვეტილებაა. "მაქსიმალური ვადა, რაც შეიძლება შეჩერების ღონისძიებას ჰქონდეს, გახლავთ თავად დავის დასრულება. როგორც კი დავა დასრულდება, დროებითი ღონისძიებაც მოხსნილად ჩაითვლება. დავის დასრულებამდე კი ჩვენ შეგვიძლია ვივარაუდოთ, რომ მინიმუმ 1 წელი გვაქვს", - აცხადებს იუსტიციის მინისტრი.

ჟურნალისტის კითხვაზე, სტრასბურგის სასამართლოს გადაწყვეტილება ხომ არ ნიშნავს იმას, რომ ევროპელი მოსამართლეების ნდობის ხარისხი ქართული მართლმსაჯულების მიმართ არც ისე მაღალია, მინისტრი პასუხობს: "არც ერთ საქმეზე სტრასბურგის სასამართლოს არ გამოუთქვამს არანაირი ეჭვი, რომ ის არ ენდობა ქართულ მართლმსაჯულებას. ჩვენი მიზანი მომავალი დავისას იქნება ისიც, რომ სტრასბურგის სასამართლოს ვაჩვენოთ, რომ ჩვენი სასამართლო არის დამოუკიდებელი, მიუკერძოებელი და არ შეიძლება ასე, ერთი ხელის მოსმით, შეეხო მის მიერ გამოტანილ გადაწყვეტილებებს", - ამბობს წულუკიანი.