ინაშვილი: არ უნდა დავუშვათ, რომ საპრეზიდენტო ინსტიტუტი ნაციონალების ხელში აღმოჩნდეს

"პატრიოტთა ალიანსის" ლიდერი, პარლამენტის ვიცესპიკერი ირმა ინაშვილი აცხადებს, რომ მთელი პარტიული აქტივი დღევანდელი საპროტესტო აქციისთვის ემზადებოდა, რომელიც "ნაციონალური მოძრაობის" წინააღმდეგ გაიმართა. ამის შესახებ მან გადაცემა "იმედი LIVE"-თან ინტერვიუში განაცხადა.

ირმა ინაშვილის თქმით, მათ დაარიგეს აქციაზე მისასვლელი დანომრილი მოსაწვევები, რომლებსაც ეწერა "არა ნაციონალურ მოძრაობს, დაიცავი საქართველო". ინაშვილის თქმით ისინი ნუმერაციით იყო დარიგებული და აქციის 97998-ე მონაწილე სცენაზე აიყვანეს. მისი თქმით, ასევე უამრავი ადამიანი იყო, რომელსაც მოსაწვევი არ შეხვდა და ისე მივიდა აქციაზე. 

ინაშვილის განცხადებით, მათ მუნიციპალიტეტებიდან ხალხის ჩამოყვანას გაუწიეს ორგანიზება, თუმცა ბევრი ადამიანი თავისით ჩამოვიდა: "ჩვენმა აქციამ ფართო საზოგადოება გააერთიანა და არ იყო ის მხოლოდ პარტიული აქცია".

ირმა ინაშვილმა დასძინა, რომ აქციაზე ძირითადი ნაწილი, 84 ათასამდე ადამიანი თბილისიდან იყო მისული.

"ასეთი დიდი აქციის ორგანიზება კაცის ძალას არ შეუძლია. თუ ნაციონალურ მოძრაობას ხელისუფლებაში მოსვლის თეორიული შანსი მაინც ექნება, ეს ნიშნავს იმას, რომ გაათმაგებული ძალებით კიდეც გვაწამებს, კიდეც მოგვკლავს, კიდეც ჩააბარებს ჩვენს მიწებს, კიდეც წაარმთევს ყველას ქონებას. არ გამოსწორდება ეს ხალხი... ყველაზე დიდი რეიტინგი არის ის რაც დღეს ჩვენ ეთერში ვნახეთ", - განაცხადა ირმა ინაშვილმა.

ირმა ინაშვილის განცხადებით მთავარი და ძლიერი ოპოზიცია არის პატრიოტთა ალიანსი, რომელთანაც, ინაშვილის თქმით, მთელი ამ წლების განმავლობაში ქართული ოცნება დისკუსიაში არ შედის. 

"ნაცმოძრაობა, იგივე ბოკერიას განშტოებები, კრიმინალების ჯგუფია, რომლებმაც მოახერხეს ქართული ოცნების კოჰაბიტაციური პოლიტიკის შედეგად პარლამენტში შეღწევა, მაგრამ ჩვენ არ უნდა დავუშვათ ის, რომ ამ ხალხის ხელში საპრეზიდენტო ინსტიტუტი აღმოჩნდეს", - განაცხადა ირმა ინაშვილმა. 

ინაშვილის თქმით, ნაციონალებს ხალხისგან პრეზიდენტის ინსტიტუტის ბერკეტის ხელში ჩაგდება არ ეკუთვნის.

"პირველ ტურში დაისაჯა ხელისუფლება და ღირსი იყო, რომ დაისაჯა. მაგრამ მეორე ტურში გაერთიანდა ხალხი. იმიტომ რომ ყველამ გავაცნობიერეთ ის საფრთხე, რაც შესაძლოა მოყვეს მეორე ტურს. ამიტომ არის ჩვენი მოწოდება თავისუფალი ყველანაირი პოლიტიკური ეგოიზმისგან, ეჭვებისგან, შიშებისგან, რომ მხარი უნდა დავუჭიროთ სალომე ზურაბიშვილს, ყველა უნდა მივიდეთ არჩევნებზე", -განაცხადა ირმა ინაშვილმა.

აქციის ორგანიზატორების თქმით, დღევანდელ საპროტესტო გამოსვლაზე დაახლოებით 98.000 -მდე ადამიანი მივიდა. აქცია დაახლოებით ორ საათს გაგრძელდა, სადაც სიტყვით „პატრიოტთა ალიანსის“ ლიდერები ირმა ინაშვილი და დავით-თარხან მოურავი გამოდიოდნენ. 

საპრეზიდენტო არჩევნების მეორე ტური 28 ნოემბერს გაიმართება.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.