პროკურატურამ ზუგდიდში ამომრჩევლის მოსყიდვის სავარაუდო ფაქტზე გამოძიება დაიწყო

სამეგრელო-ზემო სვანეთის საოლქო პროკურატურამ ტელეკომპანია „რუსთავი 2“-ის ეთერში გასულ, სავარაუდოდ ზუგდიდის მუნიციპალიტეტის საკრებულოს წევრის ფარულ ვიდეოჩანაწერთან დაკავშირებით ამომრჩევლის სავარაუდო მოსყიდვის ფაქტზე გამოძიება დაიწყო. ინფორმაციას გენერალური პროკურატურა ავრცელებს.

პროკურატურის განცხადებით, გამოძიება სისხლის სამართლის კოდექსის 164-ე პრიმა მუხლით მიმდინარეობს.

ფარულ ვიდეოჩანაწერთან დაკავშირებით კომენტარი გააკეთა გია დანელიამაც. მისი თქმით, ეს ვიდეო მის დისკრედიტაციას ისახავს მიზნად და ის მონტაჟია:

„დეტალურად არ მაქვს შესწავლილი ის, რამაც გაიჟღერა რამდენიმე საინფორმაციო არხზე. შემდგომ მოგახსენებთ. მე აქაც, საკრებულოშიც, მოედანზეც ვსაუბრობ და ჩემი მონტაჟი შეიძლება მოხდეს მათი ინტერესებიდან გამომდინარე. ეს ჩემს დისკრედიტაციას ისახავს მიზნად. გახლავართ წარმატებული ფერმერი, წარმატებული ექიმი, სოფლის მოსახლეობა ჩემს გვერდითაა. შეიძლება ნაწყენია ვინმე და ამიტომ, დისკრედიტაციის მიზნით ჩაიდინეს ეს. ტექნოლოგიური შესაძლებლობებიდან გამომდინარე თქვენც შეგიძლიათ დაამონტაჟოთ და ნებისმიერი მიმართულება მისცეთ ნათქვამს. ეს არის მიზანმიმართულად განხორციელებული დისკრედიტაცია ჩემს მიმართ. ეჭვქვეშ ვაყენებ გავრცელებული ჩანაწერების ავთენტიკურობას. ესაა გაუგებრობა და მონტაჟი“, - თქვა გია დანელიამ. 

„რუსთავი 2“-მა გამოაქვეყნა ფარული ჩანაწერი, რომელშიც სავარაუდოდ ზუგდიდის საკრებულოს წევრი გია დანელია ჰყვება, რომ თბილისიდან ჩასულ წარმომადგენელთან იყო შეხვედრაზე, სადაც უთხრეს რომ „ნებისმიერი მეთოდით იმუშაონ“, კერძოდ კი მოისყიდონ წინასაარჩევნოდ მოქალაქეები, და რომ ასევე თანხმობაა "მიცემული გატაცებაზეც“.

ასევე, პროკურატურის განცხადებით, გამოძიება სისხლის სამართლის კოდექსის 164-ე პრიმა მუხლით მიმდინარეობს ამომრჩევლის სავარაუდო მოსყიდვის ფაქტზე, ლევან ხაბეიშვილის მიერ მასობრივი საინფორმაციო საშუალებებით გავრცელებულ ინფორმაციასთან დაკავშირებით.

13 მაისს თბილისის საკრებულოს „ნაციონალური მოძრაობის“ წევრმა ლევან ხაბეიშვილმა განაცხადა, რომ ოპოზიციამ ზუგდიდში ამომრჩევლის მოსყიდვის ფაქტი გამოავლინა. ხაბეიშვილის თქმით, "ქართული ოცნება" არჩევნებში მონაწილეობაზე უარის სანაცვლოდ მოქალაქეებს 150 ლარს, ხოლო "ქართული ოცნებისთვის" ხმის მიცემის შემთხვევაში 200 ლარს სთავაზობს.

დღეს ზუგდიდში დილიდან ხმაური იყო. ზუგდიდში „ნაციონალური მოძრაობის“ მერობის კანდიდატმა სანდრა რულოვსმა სოციალურ ქსელში გამოაქვეყნა ვიდეო, რომელზეც დადიანების სასახლის ეზოში მათ მოქალაქე უპირისპირდება და ინციდენტი „ქართულ ოცნებას“ დააბრალა. ფაქტის შესწავლის მოთხოვნას ზუგდიდის საკრებულოში დეპუტატებს შორის დაპირისპირება მოჰყვა. რამდენიმე საათში მოქალაქე გელა კვარაცხელია დააკავეს. მმართველი პარტიის ადგილობრივი შტაბის უფროსმა კი ბრიფინგზე განმარტა, რომ კვარაცხელია „ოცნების“ არც წევრი და არც აქტივისტი არ არის.