გაბუნია აპირებს იმ ადამიანებს უჩივლოს, ვინც შეწყალების სკანდალს მისი გვარი დაუკავშირა

მთავარ პროკურატურაში პრეზიდენტის საპარლამენტო მდივნის დიმიტრი გაბუნიას გამოკითხვა დასრულდა. ის უწყებაში შეწყალების გახმაურებულ სკანდალთან დაკავშირებით დაიბარეს.

გამოკითხვიდან გამოსვლის შემდეგ გაბუნიამ განაცხადა, რომ ყველა იმ პირის მიმართ, ვინც შეწყალების სკანდალს მისი გვარი დაუკავშირა, სარჩელის შეტანას აპირებს და გამოძიებასაც მოითხოვს. 

„პირადად მე შევიტან განცხადებას პროკურატურაში და პირადად მე შევიტან სარჩელს სასამართლოში. ეს თემა ასე არ დამთავრდება. ჩემთვის ეს თემა არის სიკვდილ-სიცოცხლის საკითხი, როდესაც ჩემი ოჯახი არის ამ დღეში, როდესაც მე შემეხო ეს საკითხები. მე არ ვიცი ჯერ ვინ დაგეგმა, ვის სჭირდებოდა ჩემი სახელის და გვარის გარევა, როდესაც გამჭვირვალედ, სტრუქტურულად ყველაფერი ნათელი იყო“, - განაცხადა გაბუნიამ.

მისივე თქმით, მიმდინარეობს დამოუკიდებელი ჟურნალისტური გამოძიება და დეტალებზე რამდენიმე დღეში ისაუბრებს.

მოგვიანებით დიმიტრი გაბუნიას ამ განცხადებას დეპუტატი ირმა ნადირაშვილი გამოეხმაურა და თქვა, რომ გაბუნიას განცხადებებს სერიოზულად არ აღიქვამს. „წარმოუდგენელია ასეთი საქმის წარმოება ჩემ წინააღმდეგ, თუ რა თქმა უნდა, "ქართული ოცნება" არ გადაწყვეტს, ჩემი პოლიტიკური დევნა განახორციელოს გაბუნიას ხელით", - განაცხადა "ევროპული საქართველოს" წევრმა ირმა ნადირაშვილმა.

„ევროპულმა საქართველომ“ პრეზიდენტის მიერ შეწყალებულთა საქმეზე გამოძიების დაწყების მოთხოვნით საქართველოს გენერალურ პროკურატურას 19 სექტემბერს მიმართა. მაშინ ირმა ნადირაშვილი აცხადებდა, რომ წყაროს მიერ მიწოდებული ინფორმაციით, სავარაუდოდ ადგილი ჰქონდა კორუფციას და ამაში პრეზიდენტის საპარლამენტო მდივანი დიმიტრი გაბუნია იყო ჩართული. მისივე თქმით, საკითხზე გაბუნია აუცილებლად უნდა დაიკითხოს.

შეწყალებების საქმესთან დაკავშირებით პროკურატურამ უკვე გამოკითხა გიორგი ოთხმეზური და იოსებ ქოიავას მამა. სკანდალური შეწყალებები კვლავ  განხილვის მთავარი საგანია როგორც საზოგადოების ფართო მასებში, ისე პოლიტიკურ წრეებში.

დიმიტრი გაბუნია შეწყალების პროცესზე პასუხისმგებლობას პრეზიდენტის ადმინისტრაციის უფროსის მოადგილეს აკისრებს, რომელიც ამავდროულად შეწყალების დეპარტამენტის კურატორია. დიდი ალბათობით პრეზიდენტის საპარლამენტო მდივანი ანგი ხუციშვილს გულისხმობდა. შეწყალების საქმეზე დაწყებული გამოძიების ფარგლებში დაკითხვაზე ის ჯერ არ დაუბარებიათ. ხუციშვილი ამ დრომდე არც მედიასთან გამოჩენილა. ჟურნალისტები მასთან 2 დღეა ტელეფონით დაკავშირებას ცდილობენ, თუმცა უშედეგოდ. 

პროკურატურამ პრეზიდენტის მიერ შეწყალების საქმეებზე გამოძიება 20 სექტემბერს დაიწყო. ფაქტს უკვე გამოეხმაურა პრეზიდენტის ადმინისტრაცია. 

პრესაში გამოითქვა მოსაზრება, თითქოს კონკრეტული მსჯავრდებულების შეწყალებას დიმიტრი გაბუნია ლობირებდა. გაბუნია ყველა ბრალდებას უარყოფს და ამბობს, რომ მას სისხლის სამართლის საქმეებზე საადვოკატო ლიცენზია არ აქვს. 

პრეზიდენტმა პატიმრების შეწყალებაზე 18 სექტემბერს მორატორიუმი გამოაცხადა.