ბესელიას თქმით მმართველი გუნდის ოთხ წევრს პირადი ჩანაწერებით აშანტაჟებენ

დამოუკიდებელმა დეპუტატმა ეკა ბესელიამ გენერალური პროკურატურის შენობა დატოვა. ეკა ბესელიას განცხადებით, ეს არ იყო გამოკითხვა ან დაკითხვა, არამედ იყო გასაუბრება იმ განცხადებასთან დაკავშირებით, რომელიც მან რამდენიმე დღის წინ გააკეთა. 

ჟურნალისტის შეკითხვაზე, თუ რამდენმა ადამიანმა უთხრა მას, რომ ემუქრებიან, დამოუკიდებელი დეპუტატი პასუხობს: "მე ვიცი ასეთი 4 საკმაოდ სპეციფიკური შემთხვევა, შეიძლება იყოს მეტი, შეიძლება იყოს უფრო მეტი... მათ შორის კაციც არის... მმართველ გუნდში არიან... არ დავაკონკრეტებ.. სახელისა და გვარის გარეშე ფაქტი დავადასტურე". 

ეკა ბესელიას თქმით, მან გენპროკურატურაში კიდევ ერთხელ დაადასტურა, რომ არსებობენ ადამიანები, რომელთა მიმართაც გამოყენებულია უკანონო ჩაწერა და შემდეგ ამ ადამიანებს პრობლემა ექმნებათ. „თუმცა არცერთ მათგანი არ არის ისეთი, რომელსაც საკუთარი თავის დაცვა არ შეეძლოს, რადგან საუბარი არაა რიგით ადამიანზე, არამედ ისეთი პირთა წრეა, რომელთაც შეუძლიათ საკუთარი უფლების რეალიზებაც და თავის დაცვაც", - განაცხადა ეკა ბესელიამ.

დამოუკიდებელი დეპუტატის თქმით, ის ვერ გაასაჯაროებს მათი თანხმობის გარეშე იმ ადამიანების ვინაობას, ვისზეც შანტაჟი ხორციელდება და ამაში გენპროკურატურაშიც დაეთანხმნენ. 

ამასთან, ეკა ბესელიამ პროკურატურას დაუსახელა იმ ადამიანთა გვარები, რომლებიც მისი მტკიცებით, საკუთარ თანამდებობრივ სტატუსს იყენებენ და უკანონო კავშირი აქვთ სასამართლოს წარმომადგენლებთან. "კონკრეტულად დავასახელე ზარდიაშვილ-მათიკაშვილის შემთხვევა. ეს კავშირები პირდაპირ მეტყველებს უკანონო პირადი ინტერესებით მოქმედებაზე, რადგან ზეგავლენით ვაჭრობა სხვა არაფერია, თუ არა საკუთარი მდგომარეობით კონკრეტული სარგებლის მიღება", - განაცხადა ეკა ბესელიამ.

მისი თქმით, ამ კავშირების დადასტურების ყველაზე მკაფიო მაგალითი არის დავით მათიკაშვილის მეუღლის მოსამართლედ დანიშვნა. „ფაქტია ისიც, რომ ერთ-ერთის მეუღლე იუსტიციის საბჭოს თანამშრომელია, რომელიც უშუალოდ მოსამართლეების შერჩევის და მათი საქმეების მომზადების პროცესშია ჩართული და ერთ-ერთ დეპარტამენტს ხელმძღვანელობს", - განაცხადა ეკა ბესელიამ და დასძინა, რომ თუ გამოძიება დაიწყება, ის მზად არის მეტი ინფორმაცია მიაწოდოს საგამოძიებო ორგანოებს.

24 სექტემბერს ეკა ბესელიამ განცხადა, რომ პირადი ცხოვრების ამსახველი ფარული ჩანაწერებით ადამიანებზე ზეწოლა და შანტაჟი ახლაც ხდება და მისთვის რამდენიმე მსგავსი შემთხვევის შესახებ არის ცნობილი.

2019 წლის 23 ივლისს, შინაგან საქმეთა სამინისტრომ პასუხისგებაში მისცა კაცი, რომელმაც უწყების განცხადებით, ერთ-ერთი დეპუტატის პირადი ცხოვრების ამსახველი კადრები საჯარო სივრცეში პირველმა ატვირთა და გაავრცელა. ამ საკითხზე ცენტრალური კრიმინალური პოლიციის დეპარტამენტის დირექტორის მოვალეობის შემსრულებელმა მამუკა ჭელიძემ ბრიფინგზე განაცხადა.

საქმეზე გრძელდება გამოძიება საქართველოს სისხლის სამართლის კოდექსის 157-ე პრიმა მუხლის პირველი და მეორე ნაწილებით, რომ დადგინდეს აღნიშნულ დანაშაულში შესაძლო მონაწილე სხვა პირების ვინაობა. მოცემულ სისხლის სამართლის საქმეზე საქართველოს სისხლის სამართლის კოდექსის 157-ე პრიმა მუხლით დაკავებულია და სისხლის სამართლებრივ პასუხისგებაში მიცემულია 19 ადამიანი.