ადვოკატი: პოლიციელებს ზვიად რატიანი სამხრე ვიდეოკამერით უნდა გადაეღოთ და არა მობილურით

ზვიად რატიანის ადვოკატი ანა ნასრაშვილი ამბობს, რომ სამსახურებრივი მოვალეობის შესრულების დროს, პოლიციელებს ვიდეოს პირადი ტელეფონით გადაღების უფლება არ ჰქონდათ. ადვოკატი ასევე ამბობს, რომ რატიანის დაკავების ამსახველი ვიდეო, რომელიც შსს-მ გაავრცელა, შესაძლოა უწყვეტ რეჟიმში გადაღებული არ იყოს.

"კანონმდებლობით გათვალისწინებულია, რომ რეიდის ფარგლებში ვიდეოგადაღება მოქალაქესა და პოლიციის თანამშრომლებს შორის უნდა მოხდეს სამხრე ვიდეოკამარებით, რომელიც უნდა იყოს უწყვეტ რეჟიმში ჩართული. ამ შემთხვევაში წარმოდგენილი იყო ვიდეოჩანაწერები, რომლებიც გადაღებულია პირადი მობილური ტელეფონით და არა სამხრე ვიდეოკამარებით. შესაბამისად, ზოგადად მობილური ტელეფონით, სამხრე ვიდეოკამერების გაკეთება და არასასურველ დროს ჩანაწერების არგაკეთება პოლიციის თანამშრომლების მიერ არის დარღვევა",  თქვა ანა ნასრაშვილმა.

გავრცელდა ვიდეოჩანაწერი, რომელზეც ზვიად რატიანის დაკავების პროცესია აღბეჭდილი.

სასამართლომ ეს ვიდეოჩანაწერი მტკიცებულებად მიიღო.

სასამართლოს დღევანდელ სხდომაზე ბრალდების მოწმემ თქვა, რომ დაინახა როგორ უწევდა წინააღმდეგობას პოლიციელებს ზვიად რატიანი. მისი თქმით, სამართალდამცველებმა რატიანი მანქანაში "ძლივს ჩასვეს".

ზვიად რატიანი საპოლიციო კონტროლის ფარგლებში დააკავეს. სამართალდამცველების მხრიდან მისი ცემის შესაძლო ფაქტთან დაკავშირებით, "იმედის კვირის" პირდაპირ ეთერში გიორგი გახარიამ განაცხადა, რომ თუ ფაქტი დადასტურდება, პოლიციელები დაისჯებიან, მაგრამ ამავდროულად ზვიად რატიანსაც მოუწევს სამართალდამცველებისთვის შეურაცხყოფის მიყენებისა და წინააღმდეგობის გაწევის გამო პასუხის გაცემა. 

შსს-მ მომხდარზე 24 დეკემბერს ბრიფინგი გამართა. მინისტრის მოადგილემ ნათია მეზვრიშვილმა თქვა, რატიანი ნასვამი იყო და პოლიციელებს შეურაცხყოფას მიაყენა. ამასთან მეზვრიშვილმა დასძინა, რომ პროკურატურამ ზვიად რატიანის მიერ სამართალდამცველების მისამართით წაყენებულ ბრალდებაზე გამოძიება დაიწყო. საქმის მოკვლევა დაიწყო გენინსპექციამაც. დღეს კი ცნობილი გახდა, რომ ზვიად რატიანის მიმართ პოლიციელთა უფლებამოსილების შესაძლო გადამეტებაზე გამოძიება პროკურატურამაც დაიწყო.