ცრუ ჩვენების გამო დაკავებულ მოზარდს წინასწარი პატიმრობა შეეფარდა

თბილისის საქალაქო სასამართლოში ხორავას ქუჩაზე მკვლელობის საქმეზე ცრუ ჩვენების მიცემის ბრალდებით დაკავებულ არასრულწლოვნს წინასწარი პატიმრობა შეუფარდა.

ბრალდების მხარე აღკვეთის ღონისძიებად პატიმრობის გამოყენებას მოითხოვდა ხოლო დაცვის მხარემ გირაოს შუამდგომლობა დააყენა, რომელიც მოსამართლემ არ გაიზიარა.

ადვოკატი გოჩა კვარაცხელია საქალაქო სასამართლოს გადაწყვეტილებას, მისი დაცვის ქვეშ მყოფისთვის აღკვეთის ღონისძიებად პატიმრობის შეფარდებაზე დაუსაბუთებელს უწოდებს და ამბობს, რომ გადაწყვეტილებას ზემდგომ ინსტანციაში გაასაჩივრებს.

პროკურორის განმარტებით, არსებობდა რეალური, დასაბუთებული საფუძველი იმასთან დაკავშირებით, რომ ბრალდებული მიემალებოდა გამოძიებას, ასევე მართლმსაჯულების განხორციელებას შეუშლიდა ხელს.

მოზარდების მკვლელობის საქმეზე დაკავებულ არასრულწლოვანს ბრალი 20 ივლისს წარედგინა. 

ბრალდებულის ადვოკატი, გოჩა კვარაცხელია ამბობს, რომ მისი დაცვის ქვეშ მყოფი მოკლული დავით სარალიძის მამასთან შეხვედრას ადასტურებს, თუმცა ამბობს, რომ თავად ზაზა სარალიძის თხოვნა იყო, რომ საუბარი მათ შორის დარჩენილიყო.

რაც შეეხება ბრალდების მეორე ეპიზოდს, როგორც ადვოკატი ამბობს, ის არც დ.ღ.-ს სასამართლოში მიცემულ ჩვენებას და არც საქმის მასალებს არ იცნობს და შესაბამისად, ამ ეპიზოდზე ის ჯერ ვერ ისაუბრებს. 

მოზარდი 19 ივლისს დააკავეს. გამოძიებით დადგინდა, რომ არასრულწლოვანმა, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.

არსებული ინფორმაციით, ბრალდებული მე-11 კლასის მოსწავლეა და ეს სწორედ ის პირია, რომელმაც სკოლის საპირფარეშოში კონფლიქტი დაიწყო.

ხორავას ქუჩაზე მოკლული ერთ-ერთი მოზარდის მამა, ზაზა სარალიძე ცრუ ჩვენების მიცემის ბრალდებით დაკავებულ არასრულწლოვანს მღვდლის შვილის დაჭრაშიც ადანაშაულებს.

ლაპარაკია დეკანოზ შიო მენაბდეზე, რომლის შვილიც ხორავას ქუჩაზე მოზარდების მკვლელობის საქმის ერთ-ერთი მოწმეა.

ხორავას ქუჩაზე მოზარდების მკვლელობის საქმეზე გამოძიებას ხელახლა აწარმოებს შინაგან საქმეთა სამინისტრო.  სასამართლოს პარალელურად, დროებითმა საპარლამენტო საგამოძიებო კომისიამ 17 ივლისს არასრულწლოვანი მოწმე გამოკითხა. მოწმეთა დაკითხვა გრძელდება.

12 ივლისს ცნობილი გახდა, რომ დროებითი საგამოძიებო საპარლამენტო კომისია ხორავას ქუჩის საქმის გამოძიების ფარგლებში გამოკითხვების დასრულებას ივლისის ბოლოს გეგმავს, დასკვნის გამოქვეყნებას კი, აგვისტოს ბოლოს ან სექტემბრის დასაწყისში.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.