მწყემსის ადვოკატი რაიან სმითის ცხედარზე ჩატარებულ ექსპერტიზის დასკვნას ასაჯაროებს

სმიტების ოჯახის მკვლელობაში ბრალდებული 19 წლის მწყემსის, მალხაზ კობაურის ადვოკატი ვასილ მამულაშვილი რაიან სმითის ცხედარზე ჩატარებული ექსპერტიზის შედეგებს ასაჯაროებს.

ადვოკატის თქმით, მოკლული რაიან სმითის ცხედარზე ჩატარებული სასამართლო -სამედიცინო ექსპერტიზის დასკვნის შედეგად იკვეთება, რომ რაიან სმითს მიყენებული აქვს 3 ჭრილობა, კერძოდ, წელის არეში, შუბლის მიდამოდან შემავალი ჭრილობა და გამავალი ჭრილობა კისრის არეში.

როგორც ადვოკატმა განაცხადა, სავარაუდოდ გასროლები განხორციელებულია ახლო მანძილიდან, დაახლოებით 1 – 1,5 მეტრის მანძილიდან.

"გასროლები განხორციელებულია ახლო მანძილიდან, დაახლოებით 1მეტრიდან. რაიან სმითს სიცოცხლეში მიყენებული აქვს რამდენიმე დაზიანება - პირმა თუ პირებმა სმიტს ჯერ დაზიანება მიაყენეს და შემდეგ მოკლეს. ექსპერტიზის დასკვნა მიუთითებს, რომ მას დაზიანებები აქვს სიცოცხლეში მიყენებული. საზოგადოებამ იცის მალხაზ კობაურის ფიზიკური აღნაგობა და შეუძლებელია, მას ფიზიკური დაზიანება მიეყენებინა რაიან სმითისთვის. ექსპერტიზით დგინდება, რომ კობაური რასაც ამბობს, რომ რაიამ სმითთან მოხდა ფიზიკური დაპირისპირება უცხო პირების მიერ, ამის შემდეგ დაჩოქილ მდგომარეობაში ზურგის არეში ესროლეს და დაცემის შემდეგ მოხდა საკონტროლო გასროლა, მართალია. ამით დგინდება, რომ კობაურს ამ დანაშაულთან არანაირი შემხებლობა არ აქვს და სხვა ადამიანებმა ჩაიდინეს", - აცხადებს ადვოკატი.

სასიკვდილო გასროლის შესახებ კი ადვოკატის თქმით, დამატებითი ექსპერტიზა დაინიშნება და სავარაუდო ტრაექტორია დადგინდება.

სხვაგვარად ფიქრობენ შინაგან საქმეთა სამინისტროში. უწყებაში აცხადებენ, რომ სამხარაულის ექპერტიზის დასკვნა კობაურისთვის წაყენებულ ბრალდებას ამყარებს.

14 აგვისტოს მალხაზ კობაურის ფსიქიკური მდგომარეობის შესახებ ექსპერტიზის პასუხი გახდა ცნობილი. ექსპერტიზის დასკვნის თანახმად, კობაური ჯანმრთელია. მისი ადვოკატის ალექსანდრე კობახიძის თქმით, დაკავებული უდანაშაულოა.

მისივე თქმით, საქმის მასალების მიხედვით, ლორა სმითის სხეულზე ბრალდებულის ბიოლოგიური მასალებია აღმოჩენილი, თუმცა ექსპერტიზას არ დაუდგენია, რომ მოკლული ქალი   გაუპატიურებულია.

21 ივლისს „ქრონიკისთვის“ სმითების ოჯახის მკვლელობის შესახებ ახალი დეტალები გახდა ცნობილი. სამხარაულის ექსპერტიზის ბიუროს დასკვნის თანახმად, რომელიც ბრალდებულის ადვოკატებსაც გადაეცათ, მწყემსმა მალხაზ კობაურმა ლორა სმითი გააუპატიურა, მისი 4 წლის შვილი ქელებ სმითი კი თოფის მიბჯენით მოკლა.

ხადის ხეობაში ამერიკელი ოჯახის მკვლელობაში ბრალდებული 19 წლის მწყემსი სასამართლოზე გამოძიებისთვის თავდაპირველად მიცემული ჩვენების ნამდვილობას უარყოფდა და აცხადებდა, რომ სამი ადამიანი არა მან, არამედ ორმა უცხო პირმა მოკლა. განსხვავებულია ხადის ხეობის მკვიდრთა ნაწილის და სამართალდამცველების ვერსია. 

7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმითი და მისი მეუღლე ლორა - დაღუპული იპოვეს. მოგვიანებით იპოვეს მათი 4 წლის ბავშვის ცხედარიც. მათი მკვლელობის ბრალდებით 19 წლის მწყემსი მალხაზ კობაური დააკავეს. მას 11 ივლისს წინასაწარი პატიმრობა შეეფარდა.

ხადის ხეობაში მოკლული სმითების ნათესავები საქართველოში ჩამოვიდნენ და საქმის გამოძიებით დაინტერესდნენ.