კობაურის ადვოკატებმა მოკლული სმითების ცხედრების ექსპერტიზის ახალი დასკვნა გაასაჯაროვეს

ხადის ხეობაში მომხდარ მკვლელობაში ბრალდებულის ადვოკატებმა მოკლული სმითების ცხედრებზე ჩატარებულ ახალი ექსპერტიზის დასკვნა პრესკონფერენციაზე გაასაჯაროვეს.

ადვოკატების შეფასებით, ახალი ექსპერტიზით, ბრალდების მხარის ვერსია მკვლელობის შესახებ, სუსტდება. 

სამედიცინო ექსპერტიზით დგინდება, რომ ბავშვის სიკვდილის მიზეზი, მის მიმართ განხორციელებული 3 გასროლაა. ქალებ სმიტს თავის გარდა, იდაყვის, ყბის და ბარძაყის არე აქვს დაზიანებული.

ლორა სმიტის სიკვდილის მიზეზი კი, ასფიქსია - წყალში დახრჩობა გახდა.

ასევე ექსპერტიზამ დაადგინა, რომ ლორა სმიტს უკანა ტანში რაიმე ძალადობის კვალი, ან დაზიანება არ აღენიშნება, თუმცა აღმოჩენილია კობაურის დეენემის კვალი. უფლებადამცველების თქმით, ეს ფაქტი გამორიცხავს გაუპატიურებას.

მანამდე, ადვოკატებმა რაიან სმითის ცხედარზე ჩატარებული ექსპერტიზის დასკვნა გაასაჯაროვეს.

ადვოკატები პროკურატურის არაკვალიფიციურ მოქმედებაზე საუბრობენ და მოუწოდებენ მკაფიოდ გაეცეს პასუხი მნიშვნელოვან ურთიერთგამომრიცხავ გარემოებებს.

უფლებადამცველების განცხადებით, დარჩენილია 1 კომპლექსური ექსპერტიზა, რომელიც დაადგენს ჰქონდა თუ არა მალხაზ კობაურს ფიზიკური შემხებლობა გარდაცვლილებთან, საუბარია დეენემის კვალზე.

ამ საქმეზე წინასასამართლო სხდომა 26 ოქტომბერს ჩაინიშნა.

14 აგვისტოს მალხაზ კობაურის ფსიქიკური მდგომარეობის შესახებ ექსპერტიზის პასუხი გახდა ცნობილი. ექსპერტიზის დასკვნის თანახმად, კობაური ჯანმრთელია. მისი ადვოკატის ალექსანდრე კობახიძის თქმით, დაკავებული უდანაშაულოა.

მისივე თქმით, საქმის მასალების მიხედვით, ლორა სმითის სხეულზე ბრალდებულის ბიოლოგიური მასალებია აღმოჩენილი, თუმცა ექსპერტიზას არ დაუდგენია, რომ მოკლული ქალი გაუპატიურებულია.

21 ივლისს „ქრონიკისთვის“ სმითების ოჯახის მკვლელობის შესახებ ახალი დეტალები გახდა ცნობილი. სამხარაულის ექსპერტიზის ბიუროს დასკვნის თანახმად, რომელიც ბრალდებულის ადვოკატებსაც გადაეცათ, მწყემსმა მალხაზ კობაურმა ლორა სმითი გააუპატიურა, მისი 4 წლის შვილი ქელებ სმითი კი თოფის მიბჯენით მოკლა.

ხადის ხეობაში ამერიკელი ოჯახის მკვლელობაში ბრალდებული 19 წლის მწყემსი სასამართლოზე გამოძიებისთვის თავდაპირველად მიცემული ჩვენების ნამდვილობას უარყოფდა და აცხადებდა, რომ სამი ადამიანი არა მან, არამედ ორმა უცხო პირმა მოკლა. განსხვავებულია ხადის ხეობის მკვიდრთა ნაწილის და სამართალდამცველების ვერსია. 

7 ივლისს დუშეთის მუნიციპალიტეტში, ხადის ხეობაში საქართველოსა და აშშ-ის ორმაგი მოქალაქე ცოლ-ქმარი -1975 და 1976 წელს დაბადებული რაიან სმითი და მისი მეუღლე ლორა - დაღუპული იპოვეს.

მოგვიანებით იპოვეს მათი 4 წლის ბავშვის ცხედარიც. მათი მკვლელობის ბრალდებით 19 წლის მწყემსი მალხაზ კობაური დააკავეს. მას 11 ივლისს წინასაწარი პატიმრობა შეეფარდა.

ხადის ხეობაში მოკლული სმითების ნათესავები საქართველოში ჩამოვიდნენ და საქმის გამოძიებით დაინტერესდნენ.