ქობულეთში მულტიფუნქციური მწვანე ქალაქი აშენდება. ვიდეო

აჭარის მთავრობასა და კომპანია „გრინ რეზორთს“ შორის საინვესტიციო შეთანხმება გაფორმდა, რომლის თანახმადაც  ქობულეთში 180 ჰექტარზე მწვანე ქალაქი აშენდება. პროექტის საინვესტიციო ღირებულება 500 ათასი ლარია. 

მშენებლობასა და შემდგომ ოპერირების დროს 500 ადამიანი დასაქმდება. პროექტით გათვალისწინებულია გოლფის მოედნის, საფეხბურთო მოედნების, საჩოგბურთო კორტების, სხვადასხვა ზომის საცურაო აუზის, რეკრეაციული ზონების, ველობილიკის, სარბენი ბილიკის, დასასვენებელი ზონებისა და სათამაშო მოედნების მოწყობა.  

ასევე, აშენდება 250-ნომრიანი მაღალი კლასის სასტუმრო, ერთ-ერთი ყველაზე დიდი სპა-ცენტრი ევროპაში, სხვადასხვა ტიპის კვების ობიექტი, საკონფერენციო დარბაზი, აპარტამენტები, ვილები. პროექტით ასევე აშენდება სავაჭრო ცენტრი, მოეწყობა საპარკინგე ადგილი 500 ავტომობილისთვის და ვერტმფრენის დასაფრენი. 

სასტუმროსა და გამაჯანსაღებელი ცენტრის მართვას საერთაშორისო ბრენდი უზრუნველყოფს. 

„გრინ რეზორტი“ ენერგოეფექტური და ეკოლოგიურად სუფთა სამშენებლო მასალებით აშენდება. ტერიტორია აღიჭურვება ისეთი თანამედროვე ტექნოლოგიებით, როგორიცაა ელექტრომობილების დასამუხტი სადგურები და მზის ენერგიის პანელები.

პროექტი ხორციელდება კომპანია „გრინ რეზორთის“ მიერ „ელ & ერ“ კომპანისთან პარტნიორობით, რომელიც 2014 წლიდან ფუნქციონირებს საქართველოში და არაერთი ევროპული ინვესტიცია მოიზიდა.

პროექტის პრეზენტაციას საქარველოს პრემიერმინისტრი მამუკა ბახტაძე დაესწრო.