ქობულია: ჩემს დროს ფოთის ახალი ღრმაწყლოვანი პორტის თემაზე საუბარი არ ყოფილა

ჩემს დროს რაღაც პროცესზე, პირობების განსაზღვრაზე და ბრძანების გამოცემაზე საუბარი არ ყოფილა, ამას გარანტირებულად გეუბნებით, - ამის შესახებ ეკონომიკისა და მდგრადი განვითარების ყოფილმა მინისტრმა გიორგი ქობულიამ ფოთის ახალი ღრმაწყლოვანი პორტის გარშემო განვითარებულ მოვლენებზე საუბრისას განაცხადა.

კითხვაზე, ფლობდა თუ არა ინფორმაციას ამ ბრძანებისა და პროცესის შესახებ, ქობულია განმარტავს, რომ მისთვის გაუგებარია, რაზეა საუბარი და მისი მინისტრობის დროს რამე პროცესი ამ საკითხთან დაკავშირებით არ ყოფილა.

„ვერ გავაკეთებ კომენტარს ამ თემაზე, რადგან ვერ გავიგე რაზეა საუბარი. ამ ბრძანებაში არაფერი წერია, ბრძანება ერთი გვერდია, სადაც წერია, რომ რაღაც მიწის ნაკვეთზე განისაზღვროს ღრმაწყლოვანი პორტის მშენებლობის პირობები. მერე წერია დანართი 1, რა წერია ამ დანართში, ესაა საინტერესო. რაზეა საუბარი, რა მიწაზე, რა პირობებზე, დასკვნა ვერ გამოვიტანე. რა თქმა უნდა, ამაზე ჩემს დროს საუბარი არ ყოფილა“, - აცხადებს გიორგი ქობულია „ინტერპრესნიუსთან“ საუბარში.

ამასთან, ქობულია ტექნიკური და სამშენებლო ზედამხედველობის სააგენტოს ხელმძღვანელის გრიგოლ კაკაურიძის გადაყენების ფაქტსაც ეხმაურება და ამბობს, რომ შესაძლოა ბრძანება, რომლის გამოც კაკაურიძე გაათავისუფლეს, ტექნიკური ბრძანება ყოფილიყო და მისი ვინმესთვის შეთანხმება საჭირო არ ყოფილიყო. 

„გრიგოლ კაკაურიძე საკმაოდ დიდი სააგენტოს უფროსი იყო და მას თავისი უფლებამოსილებები ჰქონდა. თუმცა მე არ ვიცი, რაზეა საუბარი. მინისტრის გარდა მას კიდევ ჰყავს კურატორი - მინისტრის მოადგილე, ვისაც პირდაპირ ექვემდებარება. მინისტრის მოადგილემაც არ იცოდა? მე არ ვიცი ამ შემთხვევაში რა და როგორ მოხდა. გარანტირებულად შემიძლია ვთქვა, რომ არანაირი პროცესი ჩემი მინისტრობის დროს ამ თემაზე არ მიმდინარეობდა“, - აცხადებს ქობულია.

მისივე თქმით, ფოთის ღრმაწყლოვან პორტზე საუბარი მის თანამდებობაზე დანიშვნამდეც იყო, მაგრამ რამე ნებართვა არ გაცემულა. რაც შეეხება საკითხის გარშემო მის მიმართ გაჟღერებულ ბრალდებებს, ქობულია აცხადებს, რომ ბრალდებებს სერიოზულად ვერ უპასუხებს.

30 მაისს ეკონომიკისა და მდგრადი განვითარების მინისტრმა ნათია თურნავამ განაცხადა, რომ ფოთში ახალი ღრმაწყლოვანი ნავსადგურის მშენებლობის ნებართვის დოკუმენტი გაუქმებულია. თანამდებობიდან გადაყენებულია მშენებლობისა და ტექნიკური ზედამხედველობის სააგენტოს ხელმძღვანელი, რომელმაც ამის ნებართვა გასცა.

ანაკლიის ღრმაწყლოვანი პორტის მშენებლობის შეწყვეტის საფრთხის შესახებ ინფორმაცია „ანაკლიის განვითარების კონსორციუმმა” 29 მაისს გაავრცელა.

ქალაქ ფოთში ახალი საზღვაო ნავსადგურის მშენებლობის შესახებ ინფორმაცია ფოთის მერიამ გაავრცელა. მშენებლობის ნებართვა ეკონომიკის სამინისტროს ტექნიკური ზედამხედველობის სააგენტომ გასცა.

ანაკლიის ღრმაწყლოვანი პორტის მშენებლობის დაფინანსების საკითხზე 21 მაისს მოლაპარაკებების მეორე რაუნდი გაიმართა. მხარეებმა კრედიტორი ინსტიტუტების მიერ წარმოდგენილი 8-პუნქტიანი მოთხოვნა განიხილეს.

შეხვედრის შემდეგ „თიბისი ბანკის” თანადამფუძნებელმა ბადრი ჯაფარიძემ განაცხადა, რომ ანაკლიის პროექტს არანაირი შეფერხება არ ემუქრება. 

მიმდინარე წლის 7 მაისს ვიცეპრემიერმა, რეგიონული განვითარებისა და ინფრასტრუქტურის მინისტრმა, მაია ცქიტიშვილმა ანაკლიის მშენებარე პორტის ტერიტორია დაათვალიერა. 

ანაკლიის ღრმაწყლოვანი პორტის მშენებლობა 2017 წლის დეკემბერში ადრეული სახმელეთო სამუშაოებით დაიწყო. პორტის პირველი ფაზის მშენებლობის დასრულება და პირველი გემების მიღება 2020 წლის ბოლოსკენ იგეგმებოდა.

რა ეტაპზეა ანაკლიის პორტის მშენებლობა, ნახეთ ამ ბმულზე.