ტურიზმის მხარდასაჭერად Facebook-ზე კამპანია „გაატარე ზაფხული საქართველოში“ დაიწყო

სოციალურ ქსელში მოქალაქეებმა საქართველოში ტურისტების მოსაზიდად სხვადასხვა სახის კამპანია წამოიწყეს. ახლახანს ქსელში გაჩნდა ჯგუფი სახელწოდებით "Spend Your Summer in Georgia" ("გაატარე შენი ზაფხული საქართველოში").

ჯგუფში ქართველი მომხმარებლები წერენ რეკომენდაციებს, იწვევენ ტურისტებს. მომხმარებლების ნაწილი მზად არის უცხოელ ტურისტებს საქართველო დაათვალიერებინოს და უფასოდ მოემსახუროს მანქანით, ნაწილი კი მათ საცხოვრებელ ფართს სთავაზობს, ან უბრალოდ რჩევებს უზიარებენ ერთმანეთს.

აქ არიან ასევე უცხოელები, რომლებიც მოკლედ წერენ რა ფინანსების ფარგლებში ეძებენ საქართველოში გასაჩერებელ ადგილს და დახმარებას ითხოვენ. ჯგუფში ასევე იპოსტება საქართველოში უკვე ნამყოფი ტურისტების მიერ გადაღებული ფოტოები და რეკომენდაციები. 

"ვეხმიანებით მიმდინარე მოვლენებს, რაც უკავშირდება ქვეყნის ტურისტული იმიჯის საფრთხის ქვეშ დაყენებას, და გვსურს მოგიწოდოთ დავიწყოთ აქტიური სოციალური კამპანია გაატარე ზაფხული საქართველოში / Spend your summer in Georgia. კამპანიის მიზანია, ხელი შევუწყოთ ქვეყნის პოპულარიზაციას, მოვიზიდოთ ტურისტები და დავანახოთ მსოფლიოს, ქვეყნის რეალური ტურისტული პოტენციალი. 
კამპანიის განმავლობაში აქტიურად გავაზიაროთ ქვეყნის საიმიჯო ვიდეო რგოლები და ბლოგ-პოსტები ჰეშთეგით #spendyoursummeringeorgia", - ამბობენ ჯგუფის ადმინისტრატორები.

ჯგუფში "Spend Your Summer in Georgia" უკვე 43 ათასზე მეტი ადამიანია გაწევრიანებული.

სოციალურ ქსელებში საქართველოს ტურიზმის მხარდამჭერი კამპანია მოქალაქეების მხრიდან განსაკუთრებით აქტიურად მას შემდეგ დაიწყო, რაც რუსეთის პრეზიდენტმა ბრძანებას მოაწერა ხელი, რომლის თანახმადაც 8 ივლისიდან რუსულ ავიაკომპანიებს საქართველოში რუსეთის მოქალაქეების გადაყვანა ეკრძალებათ. ამასთან, უსაფრთხოების მიზნით ტურისტულ ოპერატორებსა და სააგენტოებს აკრძალვის პერიოდში საქართველოში ტურების დაგეგმვაზე უარის რეკომენდაცია მიეცა. პუტინმა ხელისუფლებას დაავალა, რომ საქართველოში მყოფი რუსეთის მოქალაქეების სამშობლოში დაბრუნება უზრუნველყონ.