„თიბისი“ მმართველობის სტრუქტურას ცვლის

„თიბისი ბანკის“ სამეთვალყურეო საბჭოში ცვლილებებია, კერძოდ იცვლება მმართველობის სტრუქტურა. კერძოდ, საუბარია ე.წ. „სარკისებურ საბჭოზე“, სადაც როგორც „თიბისი ბანკის“ ჯგუფის, ასევე „თიბისი ბანკის“ მართვაში ერთი და იმავე პირები იქნებიან, სამეთვალყურეო საბჭოს დონეზე. ამის შესახებ ინფორმაცია ბანკის პრესსამსახურმა გაავრცელა.

ცვლილების შედეგად „თიბისი“ PLC-ის თავმჯდომარე ასევე დაიკავებს ბანკის თავმჯდომარის თანამდებობას; ასევე ჯგუფის უფროსი დამოუკიდებელი დირექტორი იმავე თანამდებობას დაიკავებს „თიბისი ბანკშიც“.

სამეთვალყურეო საბჭოს თავმჯდომარის თანამდებობიდან მამუკა ხაზარაძის წასვლის შემდეგ, ეს ადგილი ნიკოლოზ ენუქიძემ დაიკავა, ნიკოლას დომენიკ ჰააგი კი, რომელიც „თიბისი ბანკის“ ჯგუფის უფროსი დამოუკიდებელი დირექტორია, პარალელურად ამ თანამდებობას დაიკავებს ბანკშიც.

„ზოგიერთი აქციონერის, პარტნიორი საერთაშორისო საფინანსო ინსტიტუტის და სხვა მონაწილე მხარეების რეკომენდაციების, ასევე საკუთარი, დადებითი გამოცდილების გათვალისწინებით, რომელიც არააღმასრულებელი წევრების ერთდროულად თიბისი ბანკის ჯგუფის დირექტორთა საბჭოსა და თიბისი ბანკის სამეთვალყურეო საბჭოს წევრობას გულისხმობს, საბჭომ არააღმასრულებელი დირექტორებისთვის მართვის „სარკისებური სტრუქტურა“ (Mirror Board) დაამტკიცა.

ახალი სტრუქტურის მიხედვით:

„თიბისი ბანკის“ ჯგუფის დირექტორთა საბჭოს ყველა არააღმასრულებელი წევრი, ამავე დროს იქნება „თიბისი ბანკის“ სამეთვალყურეო საბჭოს წევრი;

„თიბისი ბანკის“ ჯგუფის დირექტორთა საბჭოს თავმჯდომარე, ასევე, იქნება „თიბისი ბანკის“ სამეთვალყურეო საბჭოს თავმჯდომარე;

„თიბისი ბანკის“ ჯგუფის დირექტორთა საბჭოს მთავარი დამოუკიდებელი დირექტორი, ამავე დროს, იქნება „თიბისი ბანკის“ სამეთვალყურეო საბჭოს დამოუკიდებელი დირექტორი.

ამ გადაწყვეტილების შედეგად შემდეგი ცვლილებები განხორციელდა:

ნიკოლოზ ენუქიძე, „თიბისი ბანკის“ ჯგუფის დირექტორთა საბჭოს თავმჯდომარე, ამავდროულად, არჩეულ იქნა „თიბისი ბანკის“ სამეთვალყურეო საბჭოს თავმჯდომარედ;

ნიკოლას დომენიკ ჰააგი, „თიბისი ბანკის“ ჯგუფის დირექტორთა საბჭოს ამჟამინდელი მთავარი დამოუკიდებელი დირექტორი, ამავდროულად, არჩეულ იქნა „თიბისი ბანკის“ სამეთვალყურეო საბჭოს მთავარ დამოუკიდებელ დირექტორად;

არნე ბერგრენი „თიბისი ბანკის“ ჯგუფის დირექტორთა საბჭოს შემოურთდა, როგორც დამოუკიდებელი დირექტორი;

ამავე დროს, „თიბისი ბანკის“ ჯგუფის დირექტორთა საბჭომ დააკმაყოფილა იურკი კოსკელოს განცხადება მისი „თიბისი ბანკის“ სამეთვალყურეო საბჭოს თავმჯდომარის და წევრის თანამდებობებიდან გადადგომის შესახებ;

საბჭო მიიჩნევს, რომ აღნიშნული ცვლილებები მაქსიმალურად გაზრდის ჯგუფის საქმიანობის და ზედამხედველობის ეფექტიანობას და ასევე, ხელს შეუწყობს მმართველობის სტაბილურობას.

საბჭოს სტრუქტურა სრულად შესაბამისობაში იქნება, როგორც ადგილობრივ, ისე დიდი ბრიტანეთის კორპორაციული მმართველობის კოდექსის მოთხოვნებთან.

საბჭოს შემადგენლობაში განხილული ცვლილებების შედეგად, თიბისი ბანკის ჯგუფის დირექტორთა საბჭოს ამჟამინდელი არააღმასრულებელი დირექტორები არიან:

ნიკოლოზ ენუქიძე – „თიბისი ბანკის“ ჯგუფის დირექტორთა საბჭოს და თიბისი ბანკის სამეთვალყურეო საბჭოს თავმჯდომარე;

ნიკოლას დომინიკ ჰააგი – „თიბისი ბანკის“ ჯგუფის დირექტორთა საბჭოს და „თიბისი ბანკის“ სამეთვალყურეო საბჭოს მთავარი დამოუკიდებელი წევრი;

მარია ლუისა ჩიკონიანი – „თიბისი ბანკის“ ჯგუფის დირექტორთა საბჭოს და „თიბისი ბანკის“ სამეთვალყურეო საბჭოს დამოუკიდებელი წევრი;

ცირა კემულარია – „თიბისი ბანკის“ ჯგუფის დირექტორთა საბჭოს და „თიბისი ბანკის“ სამეთვალყურეო საბჭოს დამოუკიდებელი წევრი;

არნე ბერგრენი – „თიბისი ბანკის“ ჯგუფის დირექტორთა საბჭოს და „თიბისი ბანკის“ სამეთვალყურეო საბჭოს დამოუკიდებელი წევრი“, - წერია გავრცელებულ ინფორმაციაში.

საქართველოს გენერალური პროკურატურა „თიბისი ბანკის საქმეზე“ გამოძიებას უკანონო შემოსავლის ლეგალიზაციის ფაქტზე აწარმოებს. საუბარია 17 მილიონ დოლარზე. 

8 იანვარს ცნობილი გახდა, რომ გენერალურმა პროკურატურამ მიმდინარე გამოძიების ფარგლებში "თიბისი ბანკიდან" გარკვეული დოკუმენტაცია ამოიღო.

26 ივლისს სასამართლომ მამუკა ხაზარაძესა და ბადრი ჯაფარიძეს აღკვეთის ღონისძიების სახით თითოეულს 700 000 ლარიანი გირაო შეუფარდა. როგორც ცნობილია პროკურატურა მილიონიან გირაოს მოითხოვდა.