ეროვნულმა ბანკმა ინფლაციის ზრდა აღიარა

ეროვნული ბანკის ინფორმაციით, აგვისტოში წლიურმა ინფლაციამ (ფასების ზრდამ) 4.9 პროცენტი შეადგინა, რაც მიზნობრივ მაჩვენებელს (3%-ს) 1.6 პროცენტული პუნქტით აჭარბებს.

ეროვნული ბანკის მტკიცებით, მიზნობრივზე მაღალ ინფლაციას რამდენიმე ფაქტორი განაპირობებს. ერთჯერადი ფაქტორები, მაგალითად, სიგარეტზე აქციზის გადასახადის ზრდა (წვლილი - 0.8 პროცენტული პუნქტი), კვლავ რჩება წლიური ინფლაციის მაღალ ნიშნულზე შენარჩუნების ერთ-ერთ მიზეზად. „ამავე დროს, ბოლო პერიოდში გაიზარდა ნომინალური ეფექტური გაცვლითი კურსის გაუფასურების ინფლაციაზე გავლენა“, - წერია ეროვნული ბანკის განცხადებაში.

ქვეყნის მთავარი ფინანსური უწყება აღნიშნავს, რომ საბაზო ინფლაცია, რომელიც გამორიცხავს სურსათის, ენერგომატარებლებისა და თამბაქოს ფასებს, კვლავ დაბალია და 2.4 პროცენტს შეადგენს, რაც მოთხოვნის მხრიდან ინფლაციაზე ზეწოლის სისუსტეზე მიუთითებს.

ეროვნული ბანკის მიერ რეფინანსირების განაკვეთის, 0.5 პროცენტული პუნქტით 7.0 პროცენტამდე გაზრდის შედეგად, 98 000-ზე მეტ მომხმარებელს რეფინანსირების განაკვეთზე მიბმულ სესხებზე საპროცენტო განაკვეთი გაეზრდება. დღესდღეობით ცვლად საპროცენტო განაკვეთზე მიბმული 5045 მლნ ლარის მოცულობის სესხია გაცემული.

2 სექტემბერს ეროვნული ვალუტა აშშ დოლართან მიმართებით თითქმის 2 თეთრით გაუფასურდა - 1 აშშ დოლარის ღირებულებამ 2.9614 ლარი შეადგინა, კომერციულ ბანკებში კი 1 დოლარი 3 ლარად ივაჭრებოდა. ეს უკვე მეორე შემთხვევა იყო, როდესაც დოლარი სამ ლარად იყიდებოდა, პირველი შემთხვევა 2019 წლის ივლისში დაფიქსირდა, როდესაც ლარი ისტორიულ მაჩვენებლამდე გაუფასურდა და ერთი დოლარის ფასი 3 ლარი გახდა.

საქართველოს ეროვნული ბანკის პრეზიდენტის კობა გვენეტაძის განცხადებით, მცურავი კურსის პირობებში შეუძლებელია ლარის კურსზე პროგნოზის გაკეთება. კობა გვენეტაძემ ანალოგიური განცხადება 2018 წელსაც გააკეთა. 

4 სექტემბერის ოფიციალური გაცვლითი კურსის მიხედვით, 1 აშშ დოლარი 2.9683 ლარი ღირს.