საქართველოში 10 თვეში საერთაშორისო მოგზაურების ვიზიტებმა 8 მილიონს გადააჭარბა

2019 წლის იანვარ-ოქტომბერში საქართველოში საერთაშორისო მოგზაურების ვიზიტებმა პირველად, ისტორიულ მაჩვენებელს გადააჭარბა და 8 020 230 შეადგინა. ამის შესახებ ინფორმაციას ტურიზმის ეროვნული ადმინისტრაცია ავრცელებს. 

ზრდა წინა წლის ანალოგიურ პერიოდთან შედარებით 6.8%-ია. საერთაშორისო ვიზიტორთა მიერ განხორციელებული ვიზიტების რაოდენობამ 6 647 866 შეადგინა (ზრდა 6.2%-ია), ხოლო ტურისტული ვიზიტების რაოდენობამ - 4 429 601 (ზრდა 6%).

რაც შეეხება ოქტომბრის თვის მონაცემებს, ტურიზმის ადმინისტრაციის ცნობით, 2019 წლის ოქტომბერში საქართველოში 782 670 საერთაშორისო მოგზაურთა ვიზიტი შედგა, რაც წინა წლის ანალოგიურ მაჩვენებელს 8.8%-ით აღემატება. ტურიზმის ადმინისტრაციის ინფორმაციით, საერთაშორისო ვიზიტორთა განხორციელებული ვიზიტების რაოდენობამ 665 055 შეადგინა, რაც 8.8%-ით მეტია 2018 წლის მაჩვენებელზე, ხოლო ტურისტული ვიზიტების რაოდენობა 438 805-ს გაუტოლდა, რაც 2018 წლის მაჩვენებელს 7.8%-ით აღემატება.

2019 წლის ოქტომბრის მონაცემებით, საქართველოში რუსეთიდან 118 252 საერთაშორისო ვიზიტი შედგა, რაც 21 114 ვიზიტით ანუ 15.2%-ით ნაკლებია 2018 წლის ანალოგიურ მაჩვენებელზე. მათ შორის, ტურისტული ვიზიტის რაოდენობამ 79 477 შეადგინა, რაც 28 170 ვიზიტით ანუ 26.2%-ით ნაკლებია 2018 წლის შესაბამის მაჩვენებელზე.

10 თვის განმავლობაში რუსეთიდან ვიზიტორების ვიზიტების რაოდენობამ 1 324 226 შეადგინა, რაც 6%-ით აღემატება 2018 წლის მაჩვენებელს. მათ შორის, ტურისტული ვიზიტების რაოდენობამ 984 533 შეადგინა ანუ 1.9%-ით მეტი 2018 წელთან შედარებით.

ტურიზმის ეროვნული ადმინისტრაციის ინფორმაციით, მიუხედავად ბოლო თვეების განმავლობაში, ზრდის ტემპების გარკვეული შემცირებისა, ჯამში, ტურიზმის სფეროში დადებითი ტენდენციები შენარჩუნდა და ძლიერდება.

რაც შეეხება შემოსავლებს, წინასწარი მონაცემებით 2019 წლის იანვარი-ოქტომბერში შემოსავალი საერთაშორისო მოგზაურობიდან საქართველოში 2.8 მილიარდ დოლარს (ზრდა +0.9%) შეადგენს, რაც 25 მილიონით მეტია წინა წლის ანალოგიურ მაჩვენებელზე.