საქართველოში საერთაშორისო მოგზაურების ვიზიტებმა ახალ ისტორიულ ნიშნულს მიაღწია

ტურიზმის ეროვნული ადმინისტრაციის ინფორმციით, 2019 წლის იანვარ-ნოემბერში, 11 თვეში საერთაშორისო მოგზაურების ვიზიტებმა საქართველოში ახალ ისტორიულ ნიშნულს 8 690 352-ს მიაღწია, ზრდა წინა წლის ანალოგიურ პერიოდთან შედარებით 7.2%-ია. 

ამავე პერიოდში, საერთაშორისო ვიზიტორთა მიერ განხორციელებული ვიზიტების რაოდენობამ 7 191 042 (ზრდა+6.6%), ხოლო ტურისტული ვიზიტების რაოდენობამ  4 768 432  (ზრდა +6.3%) შეადგინა.

რაც შეეხება რუსეთიდან ვიზიტების რაოდენობას, ტურიზმის ადმინისტრაციის ცნობით, 2019 წლის 11 თვეში რუსეთიდან ვიზიტორთა ვიზიტების რაოდენობამ 1 406 255 შეადგინა, რაც +4.9%-ით მეტია 2018 წლის  მაჩვენებელზე. მათ შორის, ტურისტული ვიზიტების რაოდენობამ 1 038 132 შეადგინა, რაც 2018 წლის მაჩვენებელზე +0.1%-ით მეტია. თუმცა კონკრეტულად 2019 წლის ნოემბრისა და 2018 წლის ნოემბრის შედარებისას, რუსეთიდან საერთაშორისო ვიზიტების რაოდენობა 10.9%-ით არის შემცირებული. მათ შორის, ტურისტული ვიზიტის რაოდენობამ 53,599 შეადგინა, რაც 24%-ით ნაკლებია 2018 წლის მაჩვენებელზე.

ტურიზმის ადმინისტრაციის ცნობით, მიუხედავად ბოლო თვეების განმავლობაში,  ზრდის ტემპების გარკვეული შემცირებისა, ჯამში, ტურიზმის სფეროში დადებითი ტენდენციები შენარჩუნდა და ძლიერდება.

რაც შეეხება შემოსავლებს, წინასწარი მონაცემებით, 2019 წლის იანვარი-ოქტომბერში შემოსავალი საერთაშორისო მოგზაურობიდან საქართველოში შეადგენს 2.8 მლრდ. აშშ დოლარს (ზრდა +0.9%), რაც 25 მლნ. აშშ დოლარით მეტია წინა წლის ანალოგიურ მაჩვენებელზე.

8 ივლისიდან რუსეთის პრეზიდენტის, ვლადიმერ პუტინის ბრძანებით, რუსულ ავიაკომპანიებს საქართველოში მოქალაქეების გადაყვანა აეკრძალათ.

ვლადიმერ პუტინის ბრძანება თბილისში განვითარებულ მოვლენებს მოჰყვა, რომლის წინაპირობაც თავის მხრივ რუსი დეპუტატის, სერგეი გავრილოვის მიერ საქართველოს პარლამენტის თავმჯდომარისთვის  განკუთვნილი ადგილიდან მართლმადიდებლური საპარლამენტთაშორისო ასამბლეის წევრებისადმი სიტყვით მიმართვა გახდა. 

ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.

რუსი ტურისტები. როგორ აისახება პუტინის ბრძანება ქართულ ეკონომიკაზე? - ვრცლად წაიკითხეთ ამ ბმულზე.

ფოტო: ტურიზმის ეროვნული ადმინისტრაცია