ივანე მაჭავარიანი: ლარის გამყარებისთვის მნიშვნელოვანია პოლიტიკური სტაბილურობა

ფინანსთა მინისტრის ივანე მაჭავარიანის განცხადებით, ლარი გამყარებისკენ სვლას დაიწყებს, თუმცა ამისთვის პოლიტიკური სტაბილურობაა საჭირო. ამის შესახებ მინისტრმა პარლამენტში განაცხადა, სადაც მას "მინისტრის საათის" ფორმატში უსმენენ.

ივანე მაჭავარიანის თქმით, ლარის კურსი დიდი ხანია "ტრიალებს 3-ის მიდამოში - 2.95-დან 3-მდე" და ყველა წინაპირობაა, რომ ქვემოთ სვლა დაიწყოს, "ლარი დაიწყებს გამყარებისკენ სვლას, ოღონდ ამისთვის რასაკვირველია , მნიშნველოვანია პოლიტიკური სტაბილურობა, ეკონომიკური პროგნოზირებადობა და ბიზნესისთვის კომფორტის შექმნა", - თქვა ფინანსთა მინისტრმა.

მინისტრმა ასევე ილაპარაკა ინფრასტრუქტურულ პროექტებზე და განაცხადა, რომ წელს 2018 წელთან შედარებით, ინფრასტრუქტურულ პროექტებზე 1,1 მილიარდი ლარით მეტია ათვისებული.

მან ასევე, ისაუბრა კაპიტალური ხარჯების ათვისების ტენდენციაზე და აღნიშნა, რომ გასული წლებისგან განსხვავებით, როგორც ცენტრალური, ისე ადგილობრივი ბიუჯეტიდან, მნიშვნელოვნად გაუმჯობესდა პროექტების შესრულების მაჩვენებელი.

„მიმდინარე წლის 10 თვის მონაცემებით, გასულ წელთან შედარებით ინფრასტრუქტურულ პროექტებზე 1,1 მილიარდი ლარით მეტია ათვისებული. კაპიტალური დანახარჯების ყოველთვიური დინამიკის გაუმჯობესების შედეგად, 2019 წელს ბიუჯეტის დეფიციტის მოცულობაც ეტაპობრივად იზრდება და წლის ბოლოსთვის მშპ-ს 2.5%-ის ფარგლებში იქნება“, - განაცხადა ფინანსთა მინისტრმა.

მინისტრმა საგადასახადო შემოსავლების გეგმის შესახებაც გააკეთა განცხადება და თქვა, რომ წელს საგადასახადო შემოსავლების გეგმა 130 მილიონი ლარის გადაჭარბებით შესრულდება.

მისი თქმით, საგადასახადო შემოსავლების შესრულების მაჩვენებლების 10 თვის მონაცემებით, უკვე შესრულებულია დაგეგმილი მაჩვენებლის 84%-მდე.

„აღნიშნული მაჩვენებლისა და ნოემბერში წარმოდგენილი დეკლარაციების გათვალისწინებით, პროგნოზირებულთან შედარებით, წელს საგადასახადო შემოსავლების გეგმას 130 მილიონი ლარით გადავაჭარბებთ და 2019 წლის საგადასახადო შემოსავლები იქნება 11 მილიარდ 410 მილიონ ლარზე მეტი, რაც გახლავთ შემოსავლების სამსახურში განხორციელებული სისტემური რეფორმების შედეგი“, - აღნიშნა ივანე მაჭავარიანმა.

კიდევ ერთი ინფორმაცია, რომელიც ფინანსთა მინისტრმა გააჟღერა ის არის, რომ დღგ-ის ყალბი ანგარიშფაქტურების საქმეზე დაკავებული 62 ადამიანიდან, უმეტესობა სახელმწიფო უწყებების ყოფილი თანამშრომლები არიან.

„ძალიან სერიოზული გამოძიება ჩავატარეთ, გინახავთ ასეთი მასშტაბის ოპერაცია, როდესაც 62 ადამიანია დაპატიმრებული? არსებული თანამშრომლის ნებისმიერი სახით კონტაქტი რომ ყოფილიყო, აქამდე გამოვლინდებოდა და არავინ დააფარებდა ხელს. პირიქით, ყველა უწყება მაქსიმალურად იყო მობილიზებული, თითქმის ყველა ძალოვანი იყო ჩართული, თუ იკვეთება ამ თაღლითობაში მონაწილეობა, რომელიმე სახელმწიფო მოხელის ნებისმიერი უწყებიდან, რასაკვირველია ამაში ვიქნებოდით დაუნდობელი“, – განაცხადა ივანე მაჭავარიანმა.

ეროვნული ბანკის მიერ გამოქვეყნებული მონაცემების თანახმად, 29 ნოემბრისთვის 1 ამერიკული დოლარი 2.9744 ლარი, 1 ევრო 3.2757 ლარი ეღირება. 

28 ნოემბერს მოქმედი კურსით 1 დოლარი 2.9754 ლარი, 1 ევრო კი 3.2750 ლარი ღირს. 

ეროვნული ბანკის პრეზიდენტმა პარლამენტის საფინანსო-საბიუჯეტო კომიტეტის სხდომაზე თქვა, რომ მოსალოდნელია, რომ რეფინანსირების განაკვეთის ზრდა იქამდე გაგრძელდება, სანამ პროგნოზით არ გამოჩნდება, რომ გაცვლითი კურსიდან ინფლაციაზე მომდინარე ზეწოლა განეიტრალდა.

13 ნოემბერს ეროვნული ბანკის პრეზიდენტმა განაცხადა, რომ ინფლაცია 2020 წლის გაზაფხულიდან დაიწყებს შემცირებას. 2019 წლის 10 თვეში წლიურმა ინფლაციამ 6,9% შეადგინა

4 სექტემბერს ეროვნული ბანკის პრეზიდენტმა კობა გვენეტაძემ ინფლაციის ზრდა აღიარა და განაცხადა, რომ აგვისტოში წლიურმა ინფლაციამ (ფასების ზრდამ) 4.9 პროცენტი შეადგინა, რაც მიზნობრივ მაჩვენებელს (3%-ს) 1.6 პროცენტული პუნქტით აჭარბებს. 

Bloomberg-ზე ლარის ანტირეკორდი 26 სექტემბერს დაფიქსირდა, როდესაც კურსი 2.98-იან ნიშნულს ასცდა. სებ-მა ინტერვენციაც დააანონსა და 27 სექტემბერს ბაზარს $40 მლნ მიაწოდა, რაც ბაზარმა სრულად აითვისა.