ფინანსთა მინისტრი ლარში სესხების გაცემაზე 200 000-ლარიანი ლიმიტის შემცირებას არ ეთანხმება

ფინანსთა მინისტრი ივანე მაჭავარიანი ლარში სესხების გაცემაზე არსებული 200 000-ლარიანი ლიმიტის 100 000 ლარამდე შემცირებას არ ეთანხმება. "ლარიზაციის საკითხში უკან დახევას არ მივესალმები", - თქვა ივანე მაჭავარიანმა პარლამენტში, სადაც მას "მინისტრის საათის" ფორმატში უსმენენ. 

მინისტრის განმარტებით, მოკლე ვადაში ზღვრის შემცირებამ შესაძლებელია  ბაზარზე დოლარის მიწოდებას სტიმული მისცეს, მაგრამ იპოთეკური სესხების ამღები პირებისთვის რისკები მაინც რჩება.

"ერთი მხრივ, შემცირებამ შეიძლება, მოკლე ვადაში მცირედით უფრო დაასტიმულიროს დოლარის მიწოდება ბაზარზე, მაგრამ ეს ვერ იქნება ძალიან მასიური. მეორე მხრივ სამომავლო რისკებს მაინც უტოვებს ადამიანებს, რომლებმაც 10, 15, 20 წლის განმავლობაში მუდმივად დოლარში უნდა გაისტუმრონ იპოთეკური სესხები, ანუ შემოსავალი აქვთ ლარში, შემდეგ უნდა გადაახურდაონ, იყიდონ დოლარი და ასე გაისტუმრონ ვალი. ეს მომავალ წლებში დოლარზე ზეწოლას ინარჩუნებს", - თქვა მინისტრმა. 

13 ნოემბერს პარლამენტის თავმჯდომარემ არჩილ თალაკვაძემ განაცხადა, რომ "უკვე დროა" ლარში სესხების გაცემაზე 200 000-ლარიანი ლიმიტი 100 000 ლარამდე შემცირდეს. 

7 ნოემბერს ეროვნული ბანკის პრეზიდენტმა, კობა გვენეტაძემ განაცხადა, რომ ლარში გასაცემ სესხებზე 200 000-ლარიანი ზღვარის გადახედვის საკითხს ეროვნულ ბანკში არ განიხილავენ. 

უცხოურ ვალუტაში შემოსავლის მქონე ფიზიკური თუ იურიდიული პირების მიერ 200 000 ლარამდე სესხების უცხოურ ვალუტაში აღების შესაძლებლობის თემას ბიზნესასოციაციამაც დააყენა. 

ლარში სესხის გაცემაზე ლიმიტი 2019 წლის იანვრამდე 100 ათასი ლარი იყო, თუმცა ფიზიკურ პირებზე სესხების გაცემის დებულება 2019 წლის პირველი იანვრიდან ამოქმედდა, რომლის მიხედვითაც ზღვარი 200 000 ლარამდე გაიზარდა.