ეროვნულ ბანკი ლარში გასაცემ სესხებზე 200 000-ლარიანი ზღვარის გადახედვის საკითხს არ განიხილავს

ეროვნული ბანკის პრეზიდენტის, კობა გვენეტაძის განცხადებით, ლარში გასაცემ სესხებზე 200 000-ლარიანი ზღვარის გადახედვის საკითხს ეროვნულ ბანკში არ განიხილავენ. ამის შესახებ გვენეტაძემ საერთაშორისო კონფერენციაზე „ფინანსური განათლება და წიგნიერება: ფინანსური განათლების ხელშეწყობა სამხრეთ-აღმოსავლეთ ევროპაში“ ჟურნალისტებს განუცხადა. ინფორმაციას 1tv.ge ავრცელებს. 

უცხოურ ვალუტაში შემოსავლის მქონე ფიზიკური თუ იურიდიული პირების მიერ 200 000 ლარამდე სესხების უცხოურ ვალუტაში აღების შესაძლებლობის თემას ბიზნესასოციაცია აყენებს. ეროვნული ბანკის პრეზიდენტის თქმით, ამასთან დაკავშირებით განხილვები არ შემდგარა.

„ამ ეტაპზე ვერ გეტყვით, ეს განხილვები არ შემდგარა. 200 000 ლარიანი ზღვარი, რომელიც დღეს არსებობს, ჩვეულებრივ მოქმედებს“, –  განაცხადა კობა გვენეტაძემ.

ფიზიკურ პირებზე სესხების გაცემის დებულება 2019 წლის პირველი იანვრიდან ამოქმედდა.

1 ოქტომბერს კომერციული ბანკებისთვის საქართველოს ეროვნულმა ბანკმა ახალი რეგულაციების შემოღებაზე მიიღო გადაწყვეტილება. ქვეყნის მთავარმა ფინანსურმა ინსტიტუტმა უცხოურ ვალუტაში სარეზერვო მოთხოვნები 5 პროცენტით, ანუ 25 პროცენტამდე შეამცირა.

ახალი ინიციატივით, კომერციულ ბანკებს უცხოურ ვალუტაში სარეზერვო მოთხოვნებით 5%-ით, ანუ 30%-იდან 25%-მდე შეუმცირდებათ, რის შედეგადაც დამატებით, 700 მილიონი დოლარის გასესხებას შეძლებენ.