კომპანია „ჯორჯიან მანგანეზი“ შუქრუთის მოსახლეობას მოლაპარაკებებისკენ მოუწოდებს

შუქრუთის მოსახლეობასთან მოლაპარაკება დაახლოებით 5 თვის წინ დაიწყო. ადმინისტრაციის მხრიდან შეთავაზებული იყო მრავალი წინადადება და ეს ყველაფერი მიმდინარეობდა იმ ფონზე, რომ კომპანიას გამომუშავება ამ სოფლის ქვეშ არ უწარმოება. ამის მიუხედავად, ვგრძნობთ სოციალურ პასუხისმგებლობას და კორპორატიულ ვალდებულებას, რომ მივხედოთ იმ არეალში მცხოვრებ მოსახლეობას, რომელიც ჩვენ ოპერირებაში გვხდება, - ამის შესახებ კომპანია „ჯორჯიან მანგანეზის“ საოპერაციო დირექტორმა შუქრუთში მიმდინარე პროცესებზე საუბრისას პრესკონფრენციაზე განაცხადა.

მერაბ ლომინაძის თქმით, კომპანიამ მოსახლეობას რამდენიმე ვარიანტი შესთავაზა, რომელიც გულისხმობდა ალტერნატიულ საცხოვრებელ ადგილს, კონკრეტულ თანხას, კომპენსაციას და ყველა ეს მოლაპარაკება გამართული იყო იმ საფუძვლით, რომ შედეგი ყოფილიყო სამართლიანი ყველა მხარისათვის.

„ერთის მხრივ, მოსახლეობას გააჩნია უფლება მოითხოვოს კომპენსაცია და ჩვენ ამ ვალდებულებას არ გავურბივართ, მეორეს მხრივ კომპანიას გააჩნია უფლება და ვალდებულებაც რომ იმუშაოს, დაასაქმოს თანამშრომლები და შესაბამისად გასცეს ანაზღაურება. ის პრობლემატიკა, რომელიც შუქრუთში არის, გამოძახილს პოვებს არამარტო ჭიათურაში, არამედ ზესტაფონსა და ვარციხეჰესშიც. კომპანია გახლავთ ერთ-ერთი ლიდერი ექსპორტის თვალასაზრისით, ფეროშენადნობი სწორედაც რომ ჩვენ გაგვაქვს ექსპორტზე ყველაზე დიდი მოცულობით, ეს დაახლოებით 250 მილიონი დოლარის ფარგლებში მერყეობს. მხოლოდ ჩვენ კომპანიაზე მოსული წილი ექსპორტისა და ნეგატიურად განვითარებული მოვლენების შემთხვევაში საფრთხის ქვეშ ვაყენებთ ექსპორტს, დასაქმებულებს, სამუშაო ადგილებს და სავალუტო შემოდინებებეს“, - განაცხადა ლომინაძემ.

მისი თქმით, არსებობს ფაქტობრივი გარემოებები, რომელიც ამ სიტუაციას წინ უძღოდა.

„5 თვის განმავლობაში გამართული მოლაპარაკებები დღეს უშედეგოდ დამთავრდა. ეს ყველაფერი კი მიმართულია იმისკენ, რომ არიან ჯგუფები, რომელთაც თავიანთი დღის წესრიგი აქვთ და დაინტერესებული არიან კონკრეტულად პირადი კეთილდღეობით. უკანასკნელ პერიოდში გახშირებულია უკანონო მიწების რეგისტრაცია არა მხოლოდ შუქრუთში, არამედ ჭიათურის მუნიციპალიტეტში. სწორედ იმ კომპენსაციის მიღების მიზნით, რომელსაც კომპანია ჯეროვნად იხდიდა და მომავალშიც გადაიხდის. ნახევარი წლის წინ მივმართეთ შესაბამის ორგანოებს და კომპლექსური გამოძიება დაიწყო, რომელიც თითქმის დასრულებულია და მოკლე დროში ველოდებით შესაბამის შედეგებს. აღკვეთას უკანონობის, კორუფციული გარემოების და დაბრუნებას იმ ნორმალურ რეჟიმში, რომელშიც კომპანიამ უნდა იმუშაოს. არც ერთ ეტაპზე, არც პროტესტის პერიოდში და არც მანამდე კომპანია არ აცხადებდა უარს მოლაპარაკებებზე. მიგვაჩნია, რომ ეს რეჟიმი არის ერთადერთი ფორმატი სადაც საკითხი უნდა გადაწყდეს ყველა მხარისათვის დადებითად. დღესაც მზად ვართ დაველაპარაკოთ ცალკეულ ჯგუფებს. გავაცნოთ ის წინადადებები, რომელიც ჩვენ გვაქვს და ასევე მოვისმინოთ მათი წინადადებები სამართლიანობის გათვალისწინებით. არ გაგვაჩნია ის რესურსი, რომ კომპანიამ დიდხანს გაუძლოს მსგავს შეფერხებებს. ვთხოვთ ყველა მხარეს, ყველა შესაბამისი კომპეტენციის მქონე პირს, თუ ორგანოს , რომ ჩაერთონ პორცესში და მოხდეს შეთანხმება“- განაცხადა მერაბ ლომინაძემ.

ჭიათურაში, სოფელ შუქრუთის მოსახლეობას მაღაროსთან მისასვლელი გზა ჩაკეტილი აქვთ და მაღაროელებს მუშაობის საშუალებას არ აძლევენ. მათი თქმით, კომპანიის მიერ მიწისქვეშა სამუშაოს გამო მათ სახლებს ბზარები გაუჩნდა.