ნათია თურნავა: სანამ ნეგატიური ზეგავლენა მოხდება ეკონომიკაზე, სტიმულირების ღონისძიებებზე უნდა დავიწყოთ ზრუნვა

ეკონომიკურმა გუნდმა ბიზნესის სტიმულირების გეგმაზე მუშაობა დაიწყო და მას მალე გაასაჯაროებს. ამის შესახებ ეკონომიკის და მდგრადი განვითარების მინისტრმა, ნათია თურნავამ განაცხადა. მისი თქმით, გეგმა ტურიზმის გარდა ბიზნესის ზოგად სტიმულირებას ითვალისწინებს.

„ჩვენ დარწმუნებულები ვართ, რომ ერთობლივად გადავლახავთ ან შევარბილებთ ამ გამოწვევას. რა თქმა უნდა, ყველაფერი დამოკიდებული იქნება იმაზე, რამდენად სწარაფად მოხდება კორონავირუსთან დაკავშირებული გლობალური პრობლემის გადალახვა მთლიანად მსოფლიოში და მსოფლიო არის კონსოლიდირებუილი, მაგრამ საჭიროება გვიჩვენებს, რომ ჩვენ უკვე წინსწრებად მანამ, სანამ ნეგატიური ზეგავლენა მოხდება ჩვენს ეკონომიკაზე, უნდა დავიწყოთ ზრუნვა ეკონომიკის სტიმულირების ღონისძიებებზე, ზრუნვა ბიზნესზე, ზრუნვა დასაქმებაზე. სწორედ ამ სულისკვეთებით იქნება განმსჭვალული ის გეგმა, რომელსაც ჩვენ შევთავაზებთ საზოგადოებასა და ბიზნესს“, - განაცხადა მინისტრმა.

მინისტრის თქმით, მთავარი აქცენტი გეგმაში ტურიზმის სფეროზე გაკეთდება და მთავრობა ყველა ზომას მიმართავს, იმისთვის, რომ საქართველო ტურისტებისთვის მიმზიდველ ქვეყნად დარჩეს.

„ტურიზმი, რა თქმა უნდა, იქნება ამ გეგმის ცენტრალური ნაწილი, რადგან ტურისტული ინდუსტრია არის ის პირველი ფრონტის ხაზზე მყოფი ინდუსტრია, რომელიც ზარალდება სწორედ იმის გამო, რომ ჩვენ შეგნებულად მივმართავთ იზოლაციას იმისთვის, რომ დავიცვათ ჩვენი მოსახლეობა და სხვათა შორის მომავალი ტურისტიც დავიცვათ იმისგან, რომ საქართველო არ გახდეს ვირუსის საკმაოდ მაღალი გავრცელების კერა და ჯერჯერობით ამას მთავრობა კოორდინირებულად ახერხებს, როგორც თქვენ ხედავთ და ჩვენ ყველაფერს გავაკეთებთ იმისთვის, რომ როგორც აქამდე ვიყავით ტურიზმისთვის ერთ-ერთი ყველაზე უსაფრთხო ქვეყანა, ეპიდემიოლოგიური თვალსაზრისითაც ერთ-ერთი ყველაზე უსაფრთხო ქვეყნის იმიჯი განვიმტკიცოთ. ეს იქნება გლობალურად ქართლი ეკონომიკის სტიმულირების პაკეტი იმისთვის რომ ღირსეულად ვუპასუხოთ ამ გლობალურ გამოწვევას“, - აღნიშნა თურნავამ.

პრემიერ-მინისტრმა ეკონომიკურ გუნდს გეგმის შემუშავება მთავრობის სხდომაზე დაავალა.

საქართველოში ამ დროისთვის კორონავირუსით 24 ადამიანია დაინფიცირებული. პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

11 მარტს ჯანდაცვის მსოფლიო ორგანიზაციამ კორონავირუსი გლობალურ პანდემიად გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.