სასურსათო მაღაზიათა ქსელების ხელმძღვანელები ფასების ზრდას და მარაგის პრობლემას გამორიცხავენ

ფასების ზრდა არ განიხილება, რადგან ამის საფუძველი არ არსებობს, - ამის შესახებ პრემიერ-მინისტრსა და სასურსათო მაღაზიათა ქსელების ხელმძღვანელებს შორის გამართული შეხვედრის შემდეგ, „გუდვილის“ გენერალურმა დირექტორმა, გიორგი ხაბაშვილმა განაცხადა.

მისი თქმით, კომპანიას საკმარისზე მეტი მარაგები გააჩნია.

„მარაგები ამ დროისთვის ნამდვილად საკმარისზე მეტი გვაქვს. ისევე, როგორც ადგილობრივი სადისტრიბუციო კომპანიებიდან მიღებული, ასევე იმპორტირებული. გვაქვს რამდენიმე თვის საკმაოდ დიდი მარაგი ყველა მიმართულებით. ფასების ზრდა არ განიხილება, რადგან ამის საფუძველი არ არსებობს. რაც შეეხება სამუშაო რეჟიმს, რეჟიმი არ არის განსაკუთრებულად დაძაბული. საოპერაციო და შესყიდვების მიმართულებით ჩვეულებრივ რეჟიმში, ცოტა უფრო გაზრდილი დატვირთვით ვმუშაობთ. მინდა ვთქვა, რომ ჩვენ ნებისმიერი ტიპის მოთხოვნას და ნაკადს დავაკმაყოფილებთ“, - განაცხადა გიორგი ხაბაშვილმა.

თავის მხრივ,„ნიკორას“ გენერალური დირექტორმა, ირაკლი ბოქოლიშვილმა განაცხადა, რომ ახალი წლის დღეებშიც შეიძლება დაინახოთ დროებით ცარიელი თარო, მაგრამ ეს არ ნიშნავს იმას, რომ პროდუქტი არ არის.

მისი თქმით, არანაირი შიში და საფრთხე იმისა, რომ პროდუქტის ან ნედლეულის დეფიციტი იქნება, არ არსებობს.

„მარაგები საკმარისია, ვმუშაობთ დაძაბულ, მაგრამ ჩვეულებრივ რეჟიმში. ჩვენ მულტიფუნქციური კომპანია ვართ, გვაქვს სადისტრიბუციო ქსელი, ასევე წარმოება, მაღაზიების ქსელი, ამიტომ თავიდან ბოლომდე ვხედავთ, რა სიტუაციაა დღეს ქვეყანაში. სინამდვილეში, არანაირი შიში და საფრთხე იმისა, რომ პროდუქტის ან ნედლეულის დეფიციტი იქნება, გამორიცხულია. მთავრობა ყოველდღიურ კავშირშია ჩვენთან, ქსელებთან, პულსზე უდევს ხელი, თუ რა პრობლემები გვაქვს. ახალი წლის დღეებშიც შეიძლება დაინახოთ დროებით ცარიელი თარო, მაგრამ ეს არ ნიშნავს იმას, რომ პროდუქტი არ არის, მარაგები საკმარისია, ვმუშაობთ დაძაბულ, მაგრამ ჩვეულებრივ რეჟიმში“, - განაცხადა ირაკლი ბოქოლიშვილმა.

შეხვედრის შემდეგ, „სპარის“ გენერალური დირექტორის მოადგილე, უჩა უგულავამ განაცხადა, რომ ნამდვილად არანაირი საფრთხე არ არსებობს არც მარაგების და არც ფასის ზრდის. თუნდაც კურსის ცვალებადობა, შესაძლოა თვენახევრის ან 2 თვის შემდეგ აისახოს პროდუქტის ფასზე“.

უგულავამ მოსახლეობას სიმშვიდისკენ მოუწოდა და აღნიშნა, რომ მარაგების და სამუშაო რეჟიმის კუთხითაც არანაირი პრობლემა არ არის.

„დავეთანხმები კოლეგებს, რომ ნამდვილად არანაირი საფრთხე არ არსებობს არც მარაგების და არც ფასის ზრდის. თუნდაც კურსის ცვალებადობა, შესაძლოა თვენახევრის ან 2 თვის შემდეგ აისახოს პროდუქტის ფასზე. ყველა მინდა დავამშვიდო, რომ მარაგების კუთხით და სამუშაო რეჟიმის კუთხითაც არანაირი პრობლემა არ არის“, - განაცხადა უჩა უგულავამ.

საქართველოში კორონავირუსით ინფიცირებულთა რიცხვი 30-მდე გაიზარდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.