ივანე მაჭავარიანი: 18 000-მდე სუბიექტი საგადასახადო შეღავათით ისარგებლებს

18 000-მდე სუბიექტს, კაფეებს, სასტუმროებს, რესტორნებს და სხვა სუბიექტებს, ექნებათ შეღავათი ქონების და საშემოსავლო გადასახადზე. რომლის დეკლარირებაც მოხდება მიმდინარე ოთხ თვეში გადაუვადდებათ 1-ელ ნოემბრამდე, - ამის შესახებ ფინანსთა მინისტრმა ივანე მაჭავარიანმა ტელეკომპანია „იმედის“ გადაცემა „ქრონიკაში“ განაცხადა.

„ჩვენი ამოცანაა, პოსტკრიზისულ პერიოდში, მალევე მოვახდინოთ ეკონომიკის შემობრუნება იმ ნიშნულზე, რომელზეც ამ დრომდე ვიყავით ჩვენი ამოცანაა, პოსტკრიზისულ პერიოდში, მალევე მოვახდინოთ ეკონომიკის შემობრუნება იმ ნიშნულზე, რომელზეც ამ დრომდე ვიყავით და ეს ნიშნული საკმაოდ სოლიდური იყო“, - აღნიშნა ფინანსთა მინისტრმა.

მისი თქმით, საშემოსავლო და ქონების გადასახადის ნაწილში დაწესებული საგადასახადო შეღავათები მნიშვნელოვანი სტიმული იქნება ტურისტული სექტორისთვის. „საუბარია 18 000-მდე სუბიექტზე, აქედან ლომის წილი სასტუმროებს უკავიათ, მაგრამ ასევე, არის კაფეები, რესტორნები და სხვა ტიპის ორგანიზაციები. მათ შესაძლებლობა ეძლევათ, მოახდინონ დეკლარირებული ვალდებულების გადახდის გადავადება 4 თვით, მიმდინარე წლის პირველ ნოემბრამდე,“ - განაცხადა ფინანსთა მინისტრმა.

მან, ასევე, ხაზი გაუსვა იმ პროგრამის მნიშვნელობას, რომლის საშუალებითაც 4-დან 50 ნომრამდე სიდიდის სასტუმროები მთელი საქართველოს მასშტაბით მიიღებენ საბანკო სესხის 6 თვის პროცენტის თანადაფინანსებას. ფინანსთა მინისტრის თქმით, ეს პროექტი შეეხება ქვეყნის მასშტაბით, დაახლოებით, 2 000 სასტუმროს, რომელმაც შეიძლება მიიღოს მნიშვნელოვანი ფინანსური ზიანი.

„ამასთან ერთად, უნდა აღინიშნოს ბანკების მხრიდან გადადგმული ნაბიჯი, რომელიც ერთობლივად შევიმუშავეთ. ჩვენ მათ გავაცანით ჩვენი გეგმები და ვთხოვეთ, წარმოედგინათ წინადადებები, რისი გაკეთება შეეძლოთ. მათი ინიციატივა, ასევე, ძალიან მისასალმებელია და გულისხმობს 3 თვით სესხის გადავადებას არა მარტო ამ ბიზნესისთვის, არამედ ფიზიკური პირებისთვის“, - განაცხადა ფინანსთა მინისტრმა.

ივანე მაჭავარიანი განცხადებით, წლის დასაწყისიდან ქვეყანაში ფიქსირდებოდა პოზიტიური ეკონომიკური მაჩვენებლები. „ჩვენ, ბოლო ორი წელი ვიზრდებოდით არანაკლებ 5 პროცენტისა. მიმდინარე წლის იანვარშიც ეკონომიკური ზრდის საკმაოდ მაღალი მაჩვენებელი გვქონდა. გადაჭარბებით შესრულდა ბიუჯეტი. წელი საკმაოდ ოპტიმისტურად დაიწყო, თუმცა მოხდა ის, რაც მოხდა. დღეს ვართ ამ სიტუაციაში და ყველა ჩვენი ინიციატივა მიმართული იქნება მოსალოდნელი შედეგების მინიმიზაციისკენ“, - განაცხადა მან.

მისი თქმით, აქტიურად გაგრძელდება დღგ-ის დაბრუნების პროცესი და წელს დასაბრუნებელი თანხები გაორმაგდება. „ეს დამატებითი სტიმული იქნება ბიზნესისთვის და ამ შემთხვევაში, ეს შეეხება მთლიანად ბიზნესსექტორს. სწორედ ასეთი მასიური დღგ-ის დაბრუნება, რომელიც იქნება მიზნობრივი, ფოკუსირებული და მოიცავს ყველა სექტორს, იქნება დამატებითი სტიმული ეკონომიკისთვის. ყველაფერი ეს ,იმუშავებს კრიზისის შემდგომ პერიოდში. დღეს, ყველა ეკონომისტი, ევროპული სახელმწიფოს მთავრობათა მრჩეველი ეკონომიკის დარგში ამბობს, რომ პირველი რიგის ამოცანაა, არ მივცეთ ამ ვირუსს გავრცელების საშუალება, ჯანდაცვის სისტემა იყოს მდგრადი, არ მივიღოთ სოციალური, ჰუმანიტარული კრიზისი, რომლის მოწმენიც ჩვენ, პრაქტიკულად, ვართ. შესაბამისად, სწორედ ეს არის რიგით პირველი ამოცანა. ყველაფერი დანარჩენი ემსახურება ამ პროცესის შემდგომ პერიოდს“, - აღნიშნა ივანე მაჭავარიანმა.

საქართველოში კორონავირუსით ინფიცირებულთა რიცხვი 30-მდე გაიზარდა.

ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.

მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.

რა უნდა ვიცოდეთ პანდემიის შესახებ, წაიკითხეთ აქ.