ლევან დავითაშვილი: ქართველი ფერმერები დიზელს​ ​განსაკუთრებულ ფასად განსაკუთრებული პირობებით შეიძენენ

უახლოეს დღეებში გაფორმდება მემორანდუმი და ქართველი ფერმერები დიზელს​ ​განსაკუთრებულ ფასად განსაკუთრებული პირობებით შეიძენენ, - ამის შესახებ ტელეკომპანია „იმედის“ გადაცემაში „არენა“ სოფლის მეურნეობის მინისტრმა, ლევან დავითაშვილმა განაცხადა.

„ახლა შესაძლებლობის გამოყენების დროა და ამის საშუალება უნდა მივცეთ ადამიანებს, რომლებიც სასოფლო-სამეურნეო საქმიანობით არიან დაინტერესებულები. პირველ რიგში, რა თქმა უნდა, მათ სჭირდებათ ფინანსური რესურსები, რომ რაღაც აწარმოონ. ამ შემთხვევაში პირდაპირი სუბსიდია რეგისტრირებული ნაკვეთების მფლობელებისთვის არის ყველაზე ქმედითი და მყისიერი დახმარება. ისინი შეძლებენ, უფრო იაფად აწარმოონ თავიანთი პროდუქტი და უფრო კონკურენტუნარიანები იყვნენ. ამ დახმარებას ევროკავშირი მრავალი წლის განმავლობაში იყენებს. ​საქართველოში სოფლის მეურნეობისკენ შემოტრიალება რეალურად 2013 წელს დაიწყო, როდესაც ბიძინა ივანიშვილმა დაახლოებით 200 მილიონი ლარის დახმარება გაუწია ამ დარგს“, - განაცხადა დავითაშვილმა.

მისივე თქმით, ეს იყო უპრეცედენტოდ დიდი თანხა, ვინაიდან მანამდე სოფლის მეურნეობის სამინისტროს ბიუჯეტი რამდენიმე ათეულ მილიონ ლარს შეადგენდა.

„ამან დარგს ახალი სტიმული და ბიძგი მისცა, თუმცა მაშინ არ გვქონდა ამდენი რეგისტრირებული ნაკვეთი, არ გვყავდა ფერმერების კატეგორიები, არ გვქონდა ფერმერთა რეესტრი, მაგრამ ეს აუცილებელი სტიმული იყო, რომ დარგი გაგვეცოცხლებინა. დღეს შეგვიძლია ფერმერები აღვრიცხოთ, რათა ჩვენი დახმარება უფრო მიზნობრივი იყოს. ეს არის სარგავი თუ სათესი მასალები, მცენარეთა დაცვის საშუალებები, სასუქები, აგროტექნიკის დაფინანსება და ა.შ. სოფლის მეურნეობის პროდუქციაში დანახარჯების კუთხით ყველაზე მნიშვნელოვანი კომპონენტი არის საწვავი. პრემიერის ინიციატივა იყო, მოგვეძებნა გარკვეული ინსტრუმენტი, რათა ფერმერებმა საწვავი სპეციალური პირობებით მიიღონ. ვიმუშავეთ იმპორტიორებთან და მივედით ქმედით, ხელშესახებ პროგრამასთან, რომელსაც პირობითად „აგროდიზელი“ დავარქვით. მეტი დეტალი ამის შესახებ უახლოეს დღეებში გახდება ცნობილი, ზეგ გაფორმდება მემორანდუმი და ქართველი ფერმერები დიზელს​ ​განსაკუთრებულ ფასად განსაკუთრებული პირობებით შეიძენენ“, - განაცხადა მინისტრმა.