როდის აღდგება ტურისტული მიმოსვლა ისრაელთან. ელჩის განმარტება

ისრაელის ელჩმა საქართველოსა და ისრაელს შორის ტურისტული მიმოსვლის აღდგენის საკითხზე ისაუბრა და განაცხადა, რომ მოლაპარაკებები გრძელდება და ტურისტული მიმოსვლა მცირე ხნით გადაიდება

„ჩვენ ხანდახან გვაქვს ვიდეოკონფერენციები საჯარო მოხელეებთან და წამყვან პროფესიონალებთან საგარეო საქმეთა სამინისტროებიდან, ჯანდაცვის სამინისტროებიდან, სამოქალაქო ავიაციიდან, აეროპორტების ხელმძღვანელობიდან. ასე, რომ 20–25 ადამიანი მუშაობს ორივე დედაქალაქში და განიხილავს ძალიან ზუსტ რეგულაციებს. სწორედ ამიტომაც გრძელდება ეს პროცესი უფრო დიდხანს, ვიდრე მოსალოდნელი იყო.

გარდა ამისა, საიდუმლო არ არის, რომ ბოლო 10 დღეში ისრაელში ინფიცირების შემთხვევების უეცარი ზრდა დაფიქსირდა, რის გამოც პირდაპირი ფრენების განახლება და ტურისტული კავშირების აღდგენა გადაიწევს ალბათ 2–3 კვირით. ვიმედოვნებ, რომ მეტით - არა.

ეს დამოკიდებულია ადგილზე არსებულ ვითარებაზე. თუმცა, დაინფიცირებულთა რიცხვის უეცარი ზრდა არის არა იმიტომ, რომ ჩვენ პანდემიის ახალი ტალღა გვაქვს ისრაელში“, - განაცხადა ელჩმა.

მისივე თქმით, ისრაელში ამჟამად დღეში საშუალოდ 15 000 PCR-ტესტი ტარდება, რაც იმას ნიშნავს რომ რაც უფრო მეტი ტესტი ჩატარდება, უფრო მეტი დაინფიცირების შემთხვევა გამოვლინდება.

რან გიდორმა bm.ge-სთან ინტერვიუში ასევე განაცხადა, რომ საზღვრების გახსნა დიდი ხნით არ გადაიდება.

„გეგმა იყო, რომ პირველი ივლისიდან გახსნილიყო საზღვრები კომერციული ფრენებისთვის, თუმცა, მანამდე გვინდოდა რამდენიმე საპილოტე ტესტი ჩაგვეტარებინა – ჩამოგვეყვანა რამდენიმე ჯგუფი და გვენახა, თუ როგორ მუშაობს ეს ყველაფერი აეროპორტში, სასტუმროებში... ჩვენ ამას ივნისის შუა რიცხვებში ვგეგმავდით, თუმცა, ისრაელში ბოლოს განვითარებული მოვლენების გამო, ამ საპილოტე ტესტს 2 კვირით გადავდებთ, თუმცა, ჯერ კიდევ ვიმედოვნებთ, რომ გავხსნით საზღვრებს ივლისის პირველ რიცხვებში“, - განაცხადა ისრაელის ელჩმა.

8 ივნისს კორონავირუსით ინფიცირების შემთხვევების ზრდის გამო ისრაელში შეზღუდვების შემდგომი მოხსნა ერთი კვირით გადაიდო.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.