ირაკლი კობახიძე: 2021 წლის ბოლომდე სრულად უნდა აღვადგინოთ ეკონომიკის ის მდგომარეობა, რომელიც პანდემიამდე გვქონდა

ჩვენი ამოცანა არის მომავალი წლის ბოლომდე სრულად აღვადგინოთ ის მდგომარეობა, რომელიც პანდემიამდე გვქონდა. ეს სრულიად რეალურია და ამაზე მეტყველებს სავალუტო ფონდის წინასწარი შეფასებებიც. 2021 წლის ბოლომდე ჩვენ მინიმუმ დავუბრუნდებით ეკონომიკური განვითარების იმ ნიშნულს, რომელიც პანდემიის დაწყებამდე გვქონდა და ამის შემდეგ, მომდევნო 3 წლის განმავლობაში ყველაფერი გაკეთდება მშპ-ის მილიარდობით გაზრდისთვის, - ამის შესახებ ტელეკომპანია „იმედის“ გადაცემაში „არენა“ „ქართული ოცნების“ აღმასრულებელმა მდივანმა ირაკლი კობახიძემ განაცხადა.

„საზოგადოებამ დაინახა, რომ პანდემიის დროს ხელისუფლება იყო ძალიან ეფექტიანი და ჩვენ მაქსიმალურად ვცადეთ იმ პრობლემების თავიდან არიდება, რაც პანდემიით იყო გამოწვეული. საუბარი მაქვს როგორც სამედიცინო მხარეზე, ასევე ეკონომიკურ და სოციალურ საკითხებზე. რა თქმა უნდა, ვერც ერთი სახელმწიფო ვერ შეძლებს ამ ეკონომიკური ზიანის ერთ წელიწადში აღმოფხვრას. აშშ-მა და ევროკავშირის არაერთმა ქვეყანამ ჩვენზე დიდი ზიანი განიცადა, მაგრამ ჩვენი ამოცანა იყო ამ ზიანის მინიმუმამდე დაყვანა და სხვადასხვა ინტერვენციის საშუალებით ჩვენ ეს მოვახერხეთ, მათ შორის ბიზნესის დახმარებისა და სოციალური დახმარების სახით. რა თქმა უნდა, ეს ზიანს სრულად ვერ გაანეიტრალებს, -5 პროცენტით დაასრულებს ჩვენი ქვეყანა ამ წელს, რაც, სამწუხაროდ, აისახება და უკვე აისახა მოქალაქეების მდგომარეობაზე. თუმცა ეს ზიანი მინიმალურია სხვა ქვეყნებთან შედარებით, თუნდაც იმავე ევროკავშირში, სადაც ზოგ ქვეყნებს 10%-იანი ვარდნა ჰქონდათ. ჩვენი ამოცანა არის მომავალი წლის ბოლომდე სრულად აღვადგინოთ ის მდგომარეობა, რომელიც პანდემიამდე გვქონდა. ეს სრულიად რეალურია და ამაზე მეტყველებს სავალუტო ფონდის წინასწარი შეფასებებიც. 2021 წლის ბოლომდე ჩვენ მინიმუმ დავუბრუნდებით ეკონომიკური განვითარების იმ ნიშნულს, რომელიც პანდემიის დაწყებამდე გვქონდა და ამის შემდეგ, მომდევნო 3 წლის განმავლობაში ყველაფერი გაკეთდება მშპ-ის მილიარდობით გაზრდისთვის. ეს აისახება თითოეულ მოქალაქეზე და რადიკალურად შეამცირებს სიღარიბის დონეს საქართველოში. ჩვენ მემკვიდრეობით წინა ხელისუფლებამ სიღარიბის ძალიან მაღალი მაჩვენებელი დაგვიტოვა. მსოფლიო ბანკის მონაცემებით, სიღარიბის ზღვარს მიღმა მოსახლეობის 30% (1,150 000 ადამიანი) ცხოვრობდა. ჩვენ ეს მაჩვენებელი შევამცირეთ და პანდემიის დაწყებამდე ეს რიცხვი 730 ათას ადამიანს შეადგენდა. ეს ტენდენცია უნდა შევინარჩუნოთ და ხელისუფლება ამისთვის ყველაფერს გააკეთებს“, - განაცხადა კობახიძემ.