„აწარმოე საქართველოში“ პროგრამის ფარგლებში ახალი საწარმო გაიხსნა

პროგრამის - „აწარმოე საქართველოში“ - ფარგლებში „ნოვას“კიდევ ერთი ახალი საწარმო ამოქმედდა. ინფორმაციას ეკონომიკის სამინისტრო ავრცელებს.

„ჩვენ პროგრამა „აწარმოე საქართველოში“ შევქმენით სწორედ ასეთი საწარმოებისთვის და შესაბამისად, კიდევ უფრო გავაძლიერებთ ამ და სხვა წარმატებული კომპანიების მხარდაჭერას“, - განაცხადა ეკონომიკისა და მდგრადი განვითარების მინისტრმა აჭარაში, კომპანია „ნოვას“ ახალ საწარმოში ვიზიტის დროს.

7500 კვადრატულ მეტრ ფართობზე აშენებული საწარმოს აშენება-აღჭურვისთვის „ნოვამ“ 4 მილიონი დოლარის ინვესტიცია განახორციელა, საიდანაც 2 მილიონი დოლარი „აწარმოე საქართველოში“ პროგრამის ფარგლებში მიღებული დაფინანსებაა. 

2016 წელს კომპანიის მიერ განხორციელებული ექსპორტის ჯამურმა ღირებულებამ 2,399,962 ლარი შეადგინა. კომპანიის ინფორმაციით, 2017 წელს (I –IV თვე) განხორციელებული ექსპორტის ჯამური ღირებულება 1,250,573 ლარია და მიმდინარე წელს ექსპორტის მინიმუმ 20-30%-იანი ზრდა არის დაგეგმილი.

„ნოვაში“ წარმოებული პროდუქციის მოცულობამ 2016 წელს საშუალოდ 15,500 ტონა შეადგინა. კომპანიის წარმომადგენლების ინფორმაციით, 2017 წელს მომავალი წლისთვის ეს მაჩვენებელი დაახლოებით 20%-ით გაიზრდება.

შპს „ნოვამ“ პროგრამის - ,,აწარმოე საქართველოში“ - ფარგლებში სამშენებლო მასალების წარმოება 2015 წელს დაიწყო. კომპანია რამდენიმე სახეობის სამშენებლო მასალას აწარმოებს და ამ ეტაპისთვის 200-ზე მეტი ადამიანი ჰყავს დასაქმებული.