მთავრობის სხდომაზე პროგრამის „აწარმოე საქართველოში“ ფარგლებში გარკვეული ცვლილება დამტკიცდა

„გავაფართოეთ იმ დარგების ჩამონათვალი, სადაც შეიძლება, რომ ინვესტორმა მოიწადინოს ახალი საწარმოს შექმნა. ამისთვის მიმართავს ქონების მართვის სააგენტოს, შეარჩევს შესაფერის მიწას და გარკვეული ვალდებულებების სანაცვლოდ სიმბოლურ ფასში ეს მიწა გადაეცემა“, - ამის შესახებ ეკონომიკის მინისტრმა, ნათია თურნავამ მთავრობის სხდომის შემდეგ განაცხადა.

მინისტრის თქმით, ეს დარგებია სოფლის მეურნეობის სატყეო და თევზჭერის მეურნეობა, დამამუშავებელი მრეწველობა სრულიად, რადგან აქ ყველაზე დიდი დასაქმების შესაძლებლობა იქმნება; ორთქლის და კონდიცირებული ჰაერის მიწოდება, სხვადასხვა მანქანა დანადგარის წარმოება, ტრანსპორტი და დასაწყობება - ლოგისტიკური სერვისები და საწყობები. ასევე ჯანდაცვის და სოციალური მომსახურების საქმიანობები.

„დღეს მთავრობის სხდომამ განიხილა და დაამტკიცა მორიგი ცვლილება და დაზუსტება პროგრამა აწარმოეს ფარგლებში, სხვადასხვა კომპონენტში. მათ შორის საყურადღებოა რამდენიმე ცვლილება, პირველ რიგში მოეხსენებათ ბიზნესებს, რომ ერთ-ერთი კომპონენტი მოქმედებს ამ პროგრამის ფარგლებში, როდესაც ერთ ლარად გადავცემთ გარკვეულ ინდუსტრიულ მიწას საინვესტიციო და დასაქმების ვალდებულებების შესრულების სანაცვლოდ და ეს პრაქტიკა განსაკუთრებით რეგიონებში მოქმედებს.

ეს პრაქტიკა აპრობირებულია, მაგრამ აქამდე დარგები არ იყო მკაფიოდ გამოკვეთილი და ჩვენ ახლა გავაფართოეთ იმ დარგების ჩამონათვალი, სადაც შეიძლება, რომ ინვესტორმა მოიწადინოს ახალი საწარმოს შექმნა. ამისთვის მიმართავს ქოების მართვის სააგენტოს, შეარჩევს შესაფერის მიწას და სიმბოლურ ფასში ეს მიწა გადაეცემა“, - განაცხადა ნათია თურნავამ.

მან გამარტივების თვალსაზრისით კიდევ ერთ ცვლილებაზე გაამახვილა ყურადღება.

„ჩვენ, როდესაც მოგვმართავენ ბიზნესები და ვუსუბსიდირებთ სესხის პროცენტის დიდ ნაწილს, რა თქმა უნდა, ამის სანაცვლოდ ვუწესებთ გარკვეულ ვალდებულებებს, ასეთი ვალდებულებებია, ინვესტიციის შესრულება, დასაქმების რაოდენობა, პროფილის შენარჩუნება და დღემდე იყო ვალდებულება, რომელიც ითვალისწინებდა კონკრეტულ თარიღებში, პროდუქციის კონკრეტული რაოდენობის გამოშვებას.

ისეთი დინამიური ვითარებაა ახლა საქართველოს ეკონომიკაში, რეგიონსა და მსოფლიოში, რომ რა თქმა უნდა, ეს ზედმეტ, ბიუროკრატიულ წნეხად იქცა. ამიტომ ხშირად მოგვმართავდნენ ჩვენი ბენეფიციარი საწარმოები, რომ მომხდარიყო პროდუქციის რაოდენობაზე გადახედვა, რომელსაც ისინი აწარმოებენ. ჩვენ ამას სრულიად ვიზიარებთ - მთავრობამაც გაიზიარა, ბუნებრივია, თუ ინვესტორმა ჩადო ინვესტიცია, ბუნებრივია, ის მოწადინებულია გამოუშვას პროდუქცია და მიიღოს უკუგება, მაგრამ პროდუქციის რაოდენობა ხშირად დამოკიდებულია ბაზრის მოთხოვნაზე, რომელიც ცვალებადია განსაკუთრებით რთულ და კრიზისულ ვითარებაში. აქედან გამომდინარე ვამარტივებთ მიდგომას და ეს ვალდებულება იქნება მოხსნილი“, - აღნიშნა ნათია თურნავამ.